TIRANË- Një i ri 22-vjeçar ka rënë në prangat e Policisë së Tiranës. Efektivët kishin marrë informacion se 22-vjeçari lëvizte i armatosur, por i riu i identifikuar vetëm me inicialet K. Sh., nuk ishte në mjetin e tij. Për të shkuar në destinacion kishte përdorur një taksi, e cila u ndalua për t'u kontrolluar. Në kuadër të operacionit të koduar “Backseat”, Policia i gjeti të riut një armë zjarri dhe i vendosi prangat.
NJOFTIMI I POLICISË:
DVP Tiranë
Finalizohet operacioni policor i koduar “Backseat”. Lëvizte me armë zjarri si pasagjer në një taksi, vihet në pranga 22-vjeçari. Sekuestrohet arma e zjarrit pistoletë. Shërbimet e Forcës së Posaçme “Shqiponja”, pas sigurimit të informacionit se një shtetas, lëvizte i armatosur, me taksi, për të shmangur kontrollet e Policisë, kanë organizuar dhe finalizuar operacionin policor të koduar “Backseat”.
Si rezultat i veprimeve të shpejta dhe profesionale operacionale, tek Bulevardi i Ri, u ndalua taksia me të cilën lëvizte shtetasi K. Sh., 22 vjeç. Nga kontrolli fizik, iu gjet e iu sekuestrua 1 armë zjarri pistoletë. Në përfundim të veprimeve procedurale të kryera nga Komisariati Nr. 3, 22-vjeçari u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe i municionit”dhe materialet iu referuan Prokurorisë së Tiranës, për veprime të mëtejshme./ZËRI
