TIRANË- Telefoni dhe kompjuteri i shqiptarëve nuk po përgjohet nga instalimi i pajisjeve DPI. Kështu pretendon drejtori i përgjithshëm i Autoritetit Kombëtar të Sigurisë Kibernetike, Igli Tafa. Në një prononcim që ai ka dhënë për "Top Channel" thotë se pasjisjet "DPI", luajnë funksionin e mbrojtjes.
“Këtu më lejoni te sqaroj dhe të qetësoj të gjithë qytetarët se në radhë të parë 100% e trafikut të internetit është i inkreptuar. Kështu që protokollet e inkreptuara e bëjnë të pamundur shikimin e informacionit sensitiv që është kush komunikon me kë dhe çfarë kanë mesazhet e me radhë,”- Igli Tafa, drejtor i Përgjithshëm, AKSK.
Po ashtu, sqaron se në vendin tonë janë instaluar 7 pajisje DPI në kompanitë celulare për të bërë të mundur bllokimin e aksesit në platformën online "TikTok". Ndërsa shton se kjo pajisje rrit edhe sigurinë kibernetike në vend, pasi mbron nga sulmet e hakerave.
Më shumë detaje për mbrojtjen ka dhënë Adriano Lleshi, drejtor i Analizës së Sigurisë Kibernetike, ASKS.
“Teknologjia e DPI është teknologji shumë e avancuar që bën të mundur identifikimin dhe bllokimin e signature ku ne aktualisht po bëjmë bllokimin e Tiktok. Kjo i përket fazës së dytë të bllokimit për shkak se faza e parë ishte në nivel domeinash, IP, SLI të gjitha që janë kontent të proviber që i përkasin bllokimit të TikTok. Aktualisht shikohet identifikimi i paketave që aksesojnë TikTok dhe bëjnë më pas bllokimin.”
Sipas Lleshit, këto pajisje nuk do të qëndrojnë përgjithmonë në gjendje pune.
“Bllokimi në nivel DPI do të bëhet maksimumi në një një vit derisa sa të arrijmë në një marrëveshje me TikTok që të vendosë filtrat e duhura që ndalojnë bullizmin kibernetik,”-shtoi ai.
Çfarë është DPI?
Deep Packet Inspection (DPI) është një teknologji e avancuar që lejon monitorimin dhe filtrimin e trafikut të internetit në mënyrë të detajuar. Me këtë pajisje, qeveria mund të: Identifikojë dhe bllokojë platforma specifike si TikTok, VPN-të dhe rrjete të tjera sociale; Monitorojë sjelljen e përdoruesve në internet, duke analizuar në kohë reale të dhënat e tyre; Filtrimin dhe censurimin e përmbajtjes, duke kufizuar aksesin ndaj informacioneve të caktuara. Rreziqet e përdorimit të DPI: – Përgjim masiv – Çdo klikim dhe kërkim në internet mund të analizohet; – Censurë e kontrolluar – Platformat sociale mund të bllokohen pa paralajmërim; – Privatësi e shkelur – Komunikimet personale mund të monitorohen dhe rreziku i abuzimit politik – Teknologjia mund të përdoret për të manipuluar informacionin dhe për të ndikuar te liria e shprehjes./ZËRI
