SHKODËR- Një tjetër rast i dyshuar mashtrimi përmes një call center-i është goditur nga strukturat e Krimit Ekonomik dhe Kibernetik të Policisë së Shtetit. Këtë herë operacioni është zhvilluar në Shkodër, ku u zbulua një subjekt që dyshohet se përdorej për mashtrime kompjuterike. Gjatë aksionit u arrestuan në flagrancë Fabian Popaj, administratori i subjektit, Lisenko Muçaj, Basri Nikshiqi dhe Nikolin Biba. Ndërkohë janë proceduar penalisht 61 punonjës të call center-it.
Gjatë kontrollit të ushtruar në ambientet e këtij call center-i, shërbimet e Policisë sekuestruan në cilësinë e provës materiale 152 pajisje elektronike, të cilat dyshohet se përdoreshin për realizimin e mashtrimeve, si dhe materiale të tjera me interes për vijimin e hetimeve.
Njofimi i Policisë:
Shkodër / Finalizohet operacioni i koduar “Netëork”.
Zbulohet në lagjen “Vasil Shanto”, një call center ku dyshohet se kryhej mashtrim kompjuterik.
Arrestohen në flagrancë 4 shtetas, organizatorë dhe drejtues të kësaj veprimtarie.
Procedohen penalisht 61 punonjës, të cilët u kapën në flagrancë gjatë ndërhyrjes së Policisë, në call center.
Sekuestrohen 152 pajisje elektronike, nëpërmjet të cilave dyshohet se kryhej mashtrimi, si dhe materiale të tjera me interes për hetimin.
Specialistët e Sektorit për Hetimin e Krimeve Ekonomike dhe Financiare të DVP Shkodër, në bashkëpunim me specialistët e Sektorit për Hetimin e Krimeve Ekonomike dhe Financiare në Drejtorinë për Hetimin e Krimeve Ekonomike dhe Financiare në Drejtorinë e Përgjithshme të Policisë së Shtetit, si rezultat i hetimeve të kryera me metoda proaktive, në funksion të një procedimi penal, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Shkodër, organizuan dhe finalizuan operacionin e koduar “Netëork”.
Si rezultat i operacionit u arrestuan në flagrancë shtetasit:
-F. P., 37 vjeç, banues në fshatin Bajzë, administrator i subjektit;
-L. M., 43 vjeç, B. N., 41 vjeç dhe N. B., 42 vjeç, të tre banues në Shkodër.
Nga veprimet hetimore dyshohet se këta shtetas organizonin veprimtarinë kriminale të mashtrimit kompjuterik në këtë subjekt dhe drejtonin grupet e punonjësve.
Gjatë operacionit, në ambientet e subjektit u kapën në flagrancë, gjatë ushtrimit të aktivitetit, 61 shtetas, për të cilët nisi procedimi në gjendje të lirë.
Gjatë kontrollit të ambienteve u gjetën dhe sekuestruan me cilësinë e provës materiale, 152 pajisje elektronike (kompjuterë, laptopë dhe pajisje të tjera të përdorura për ushtrimin e veprimtarisë), një shumë parash, si dhe materiale të tjera me interes për hetimin.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
