Situata e zjarreve/ 11 vatra ende aktive, operacion masiv në Gurë-Lurë, ndërhyrje nga toka dhe ajri
TIRANË- Shqipëria vijon të jetë nën pushtetin e zjarreve, ku deri në orën 14:00 të kësaj të diele, janë regjistruar 21 vatra, 11 prej të cilave mbeten aktive.
Ministria e Mbrojtjes bën me dije se në të gjitha vatrat aktive, situata po menaxhohet përmes operacioneve nga terreni dhe ajri. Në Gurë-Lurë, Dibër po vijon operacioni me perimetër të gjerë, ku janë angazhuar një numër i madh forcash në terrem, të mbështetura me ndërhyrjen e avionëve nga ajri.
Situata po monitorohet në të gjitha vatrat aktive, ndëra një vatër e re zjarri është konstatuar në sipërfaqe me barishte dhe shkurre në Leminot të Maliqit, ku po punohet për shuarjen e flakëve.
Njoftimi i plotë:
Ministria e Mbrojtjes informon se deri në orën 14:00 janë regjistruar 21 vatra zjarri, nga të cilat 11 mbeten aktive dhe 3 janë në monitorim.
Në operacionet për shuarjen e tyre janë angazhuar 387 forca operacionale dhe 23 automjete zjarrfikëse. Në mbështetje janë angazhuar gjithashtu 100 efektivë të Forcave të Armatosura, 2 automjete zjarrfikëse, 3 helikopterë dhe 2 avionë Air Tractor të Forcës Ajrore.
Vatrat kryesore aktive dhe angazhimi:
* Mali i Dajtit, Tiranë – Vijon puna për shuarjen e zjarrit, me mbështetjen e 50 efektivëve të FA dhe 2 helikopterëve të Forcës Ajrore. Nuk ka rrezik për zonat e banuara. Ndërkohë, vatra Priskë–Gurrë e Madhe–Farkë–Lundër është nën kontroll dhe monitorim.
* Vakumone, Shëngjergj – Vijon puna me forcat e MZSH, vullnetarë dhe strukturat vendore. Nuk ka rrezik për zonat e banuara.
* Abaze, Krujë – Zjarri mbetet aktiv, por me intensitet të ulët. Në terren po punojnë 2 automjete zjarrfikëse, 24 efektivë, 10 vullnetarë dhe 15 forca të ADZM. Nuk ka rrezik për zonat e banuara.
* Gurë-Lurë, Dibër – Vijon operacioni në një perimetër të gjerë. Janë angazhuar 115 forca bashkiake, 13 forca policore, 11 ADZM, 14 efektivë MZSH me 2 automjete zjarrfikëse, 7 vullnetarë dhe 50 efektivë të FA, të mbështetur nga 2 avionë Air Tractor dhe një automjet zjarrfikës i FA. Korridoret e hapura kanë penguar avancimin e zjarrit drejt banesave dhe aktualisht nuk ka rrezik për zonat e banuara.
* Qafë Helmes, Dibër/Bulqizë – Zjarri është fikur nga krahu i Bulqizës dhe vijon aktiv në drejtim të Selishtës. Në terren janë 6 forca bashkiake dhe 5 vullnetarë. Nuk ka rrezik për banesat.
* Bruç, Mat – Zjarri ka shtrirje të gjerë në një zonë shkëmbore me akses të vështirë. Në operacion janë 1 automjet zjarrfikës dhe 5 efektivë. Nuk ka rrezik për banesa, stane apo blegtori.
* Lufaj, Mirditë – Vijon puna me 20 forca për hapjen e korridoreve ndarëse, ndërsa në mbështetje është angazhuar edhe 1 helikopter i FA. Vatra mbetet aktive, por me intensitet më të ulët.
* Tharri, Mirditë – Vatra është vënë nën kontroll. Në terren janë 2 automjete zjarrfikëse, 8 efektivë MZSH, 8 forca bashkiake, 15 vullnetarë dhe 5 policë, ndërsa vijon puna për fikjen e plotë.
* Fushë-Lajë, Pukë – Zjarri nuk paraqet intensitet të lartë, megjithëse ka përhapje në sipërfaqe. Në operacion janë 2 automjete zjarrfikëse, 10 efektivë MZSH dhe 16 forca bashkiake. Nuk ka rrezik për zonat e banuara.
* Rrjoll, Shkodër – Vatra ndodhet në terren të paarritshëm; situata monitorohet nga afër dhe është përdorur edhe dron për evidentimin e shtrirjes së saj.
* Trevllazër, Vlorë – Vatra është nën kontroll, ndërsa MZSH vijon punën për shuarjen e plotë.
* Leminot, Maliq – Një vatër e re është evidentuar në sipërfaqe me barishte dhe shkurre; MZSH Maliq është në terren dhe po punon për shuarjen.
Flakët te hoteli në Lungomare, shefi i reanimacionit në Vlorë: Një vajzë është djegur pothuajse 100% (VIDEO)
VLORË- Gjashtë persona mbetën të lënduar si pasojë e zjarrit në hotel "Brooklyn" në Vlorë, ku një në gjendje të rëndë shëndetësore ndodhet një vajzë për shkak të djegieve që ka pësuar.
Lidhur me gjendjen e tyre shëndetësore ka reaguar edhe shefi i Reanimacionit në Spitalin e Vlorës, Edmond Breshanaj. Në një prononcim për mediat, Breshanaj bëri me dije se 5 prej tyre janë dërguar menjëherë në Tiranë për të marrë trajtim më të specializuar.
Sipas mjekut, disa prej tyre kanë pësuar djegie, ndërsa 2 të tjerë fraktura në trup pasi janë hedhur nga ballkonet. Ai shtoi se një vajzë ndodhet në gjendje të rëndë, pasi ka pësuar rreth 100% djegie.
View this post on Instagram
“Ishte situatë shumë emergjente, ishin 6 pacientë të dëmtuar nga ekspozimi. Ishin në katin e dytë. 3 ishin të djegur rëndë dhe 2 ishin hedhur nga kati i dytë, kishin pësuar fraktura të kolonës. Dy prej tyre i nisëm në qendrën e Traumës sepse s’kishin djegie dhe 3 në repartin e djegieve. Patëm lajmërim të të gjithë ekipit, ishin të gjithë në gatishmëri. Kanë mbërritur rreth orës 4 e gjysmë. Një paciente që rrezikon jetën ishte djegur pothuajse 100%, një 50%. Ishin mosha të reja, 25-30 vjeç. Ishin nga Prishtina, Lipjani dhe njëri pacient nga Rrësheni”, thotë shefi i Reanimacionit në Spitalin e Vlorës, Edmond Breshanaj.
Zjarri në hotelin "Brooklyn" Vlorë, pushuesit rrëfejnë momentet e tmerrit: U hodhëm nga ballkoni, nuhatëm diçka të çuditshme...(VIDEO)
VLORË- Pushuesit që ndodheshin në hotelin “Brooklyn” në Lungomaren e Vlorës ka rrëfyer momentet e frikshme gjatë zjarrit që përfshiu godinën në orët e para të mëngjesit të sotëm.
View this post on Instagram
Një shqiptar nga Kosova, Luan Salihu, 21-vjeç, ka rrëfyer momentet e panikut. 21-vjeçari tregon se është hedhur nga ballkoni bashkë me të fejuarën për t’i shpëtuar flakëve.
“Jemi nga Lipjani. Isha në gjumë, ishte ore gati 04:00 mëngjesit. E fejuara u ngrit e para dhe më tha “ngrihu nga gjumi se nuk e di çfarë ka ndodhur”. U ngritëm me dalë nga dera dhe ishte tym, tymi hyri brenda. Dolëm nga ballkoni , ishte flakë dhe tym.
U hodhëm dhe nuk u lënduam nga djegia. Kur jam hedhur kam rënë me një cep të një hekuri dhe kam lënduar këmbën. Ka qenë edhe një familje me një fëmijë të vogël. Ishte dita e dytë aty në hotel. Isha në katin e dytë sipër lokalit”, tha Luan Salihu.
Ndërkohë, një tjetër pushues me orgjinë nga Polonia, ka treguar momentin kur kuptuan se në hotel kishte rënë zjarr. Në një prononcim për mediat, pushuesi polak ka treguar se kishte nuhatur diçka të çuditshme dhe më pas është hedhur nga dritarja pasi kanë konstatuar zjarrin.
“U zgjuam natën, nuhatëm diçka të çuditshme, dëgjuam të bërtitura. U hodhëm nga dritarja, thirrëm për ndihmë. Kaq. Jam nga Polonia. Ora ishte rreth 4 e mëngjesit”, thotë djali./ZËRI
Përfshihet nga flakët hoteli në Vlorë, 6 pushues përfundojnë në spital! Ministria e Shëndetësisë: Një vajzë ka djegie të rënda (VIDEO)
VLORË- Një zjarr i përmasave të mëdha ka përfshirë një godinë në zonën e Lungomares në Vlorë. Ngjarja ka ndodhur rreth orës 04:05 të mëngjesit të sotëm, ku sipas informacioneve paraprake, flakët kanë nisur fillimisht në lokalin në katin e parë të hotel 'Brooklyn' dhe më pas janë përhapur në katet më sipër.
Raportohet se si pasojë e zjarrit, 6 persona që ndodheshin brenda në hotel, 5 shqiptarë nga Kosova dhe 1 nga Rrësheni, kanë mbetur të plagosur dhe janë dërguar për ndihmë mjekësore.
Ndorina Rexhepi 25 vjec
Arlinda Rexhepi 27 vjec
Erza Grainca 21 vjec
Aldo Kasimi 30 vjec
Ana Dyrmishi 25 vjec
Luan Saliu, 21 vjeç
Sipas njoftimit zyrtar të Policisë, zjarri ka qenë aksidental i shkaktuar nga djegia e prizës elektrike të frigoriferit, i cili ndodhej në ambientet e restorantit. Sa i përket të lënduarave, janë transportuar në spital ku po marrin ndihmë mjekësore, ku 2 prej tyre kanë pësuar djegie të konsiderueshme trupore.
“Sot, rreth orës 04:05, në lagjen “10 Korriku”, Vlorë, ka rënë zjarr në ambientet e brendshme të një hoteli, në pronësi të shtetases M. A.
Si pasojë e zjarrit janë lënduar 6 pushues, (5 prej tyre shtetas të Kosovës dhe 1 shtetas nga Rrësheni).
Pesë nga të lënduarit janë transportuar për mjekim në Spitalin e Djegieve në Tiranë, ku 2 prej tyre kanë pësuar djegie të konsiderueshme trupore. Një shtetas po merr ndihmë mjekësore në Spitalin Rajonal Vlorë.
Gjithashtu, nga zjarri janë shkaktuar dëme materiale.
Nga veprimet hetimore të kryera, përfshirë këqyrjen e pamjeve të kamerave të sigurisë, rezultoi se zjarri ka qenë aksidental, i shkaktuar nga djegia e prizës elektrike të frigoriferit, i cili ndodhej në ambientet e restorantit.
Grupi hetimor, nën drejtimin e Prokurorisë, vijon veprimet procedurale për dokumentimin e plotë të ngjarjes”, njofton policia.
Gjithashtu, Ministria e Shëndetësisë ka dhënë detaje mbi gjendjen shëndetësore të personave të lënduar nga zjarri. Në reagimin publik, Ministria bën me dije se njëra prej pacienteve është në gjendje të rëndë për shkak të djegieve masive që ka pësuar në trup dhe po merr trajtim në Qendrën Spitalore Universitare ‘Nënë Tereza’.
Ndërkohë, pacionetët e tjerë të shtruar në QSUT, janë në gjendje të stabilizuar dhe po mbahen në monitorim.
“Si pasojë e zjarrit të rënë në një hotel në Vlorë, në QSUT janë paraqitur tre qytetarë, të cilët aktualisht po marrin trajtim mjekësor.
Njëra prej pacienteve është në gjendje të rënduar, për shkak të përqindjes së lartë të djegieve, ndaj kërkon monitorim dhe kujdes të vazhdueshëm mjekësor.
Pacienti tjetër klinikisht paraqitet më i qetë dhe po ndiqet nga stafi mjekësor.
Ndërsa në Spitalin Universitar të Traumës po marrin trajtim mjekësor dy paciente, të cilat janë paraqitur me dëmtime të shumta.
Njëra prej pacienteve paraqitet në gjendje shëndetësore të stabilizuar dhe vijon të jetë nën kujdesin e stafit mjekësor.
Pacientja tjetër, gjendja shëndetësore e së cilës është aktualisht e stabilizuar, por për shkak të dëmtimeve të marra do të vijojë të mbahet në monitorim intensiv dhe të vazhdueshëm nga stafi mjekësor.
Stafet mjekësore do vijojnë të ndjekin me kujdes gjendjen shëndetësore të pacientevë duke ofruar trajtimin e nevojshëm mjekësor”, thuhet në deklaratë.
