GREQI- E goditi të paktën 40 herë me katër thika, ky ishte përfundimi në të cilin doli ekspertiza mjeko-ligjore për vrasjen e 44-vjeçares shqiptare nga i shoqi në Selanik. Sipas mediave greke, gruaja ka marrë më shumë se 40 plangë në pjesë të ndryshme të trupit; në qafë, bark, krahë dhe fytyrë, duke bërë që ajo të ndërronte jetë nga humbja e gjakut. Ekspertët kanë bërë me dije se goditjet ndaj saj kanë qenë aq të forta saqë njëra nga thikat është përkulur.
Sipas informacioneve, varrimi i gruas do të bëhet në ditët në vijim, ndoshta nesër, në Shqipëri, ndërsa ceremonia për të shoqëin, 53-vjeçar do të zhvillohet po në Shqipëri, por pak ditë më vonë. Ai i dha fund jetës pasi u hodh nga kati i dytë i banesës pasi kreu krimin. Ndërkohë dy vajzat e çiftit, emrat e të cilëve nuk janë zbuluar, 16 dhe 21 vjeçe, të cilat humbën papritur prindërit, mbeten në gjendje shoku dhe mësohet se nuk kanë mundur të dëshmojnë në polici.
Ndaj edhe nuk dihet përse ka ndodhur krimi! Nga fotot e postuara nga autori dhe e shoqja në rrjetet sociale duken një familje normale, madje tregonin me dashuri momentet familjare dhe udhëtimet që bënin edhe me miqtë e tyre. Duke folur për protothema.gr, një mikeshë dhe kolege e ngushtë e gruas fatkeqe tha se nuk mund ta besojë atë që ndodhi.
"Ajo ishte një njeri i jashtëzakonshëm, ishte e qetë dhe kujdesej vetëm për fëmijët e saj. Ajo më thoshte se kishte probleme me burrin e saj, por nuk më dha asnjë detaj. Ishte gjithmonë e buzëqeshur dhe përballonte gjithçka pa u ankuar, pavarësisht vështirësive që po kalonte,”-tregoi ajo.
Shoqja e viktimës theksoi gjithashtu se ato pak herë që ajo e kishte parë autorin, edhe para se të vetëvritej, ai ishte sjellë mirë përballë saj dhe pse nuk fliste shumë.
“Nuk mund ta dija se çfarë fshihte shpirti i tij,”-shtoi ajo.
Në momentin e vrasjes, dy vajzat nuk ishin në banesë, ndërsa çifti ishin në ballkon ku edhe ka ndodhur vrasja. 55-vjeçari u hodh nga kati i dytë, por ndërroi jetë rrugës teksa shkonte në spital./ZËRI
