Edhe mumiet në Egjiptin e Lashtë parfumoseshin! Tani njerëzit do të kenë mundësinë që të nuhasin edhe aromat që ata përdornin në atë kohë. Kjo u zbulua falë një studimi të "Scientific Reports". Shkencëtarët analizuan mbetjet e balsameve të gjetura në fund të dy vazove antike të përdorura nga egjiptianët gjatë procesit të mumifikimit të një gruaje që vinte nga një familje e rangut të lartë, që quhej Senetnai.
Ajo jetoi gjatë dinastisë së 18-të në vitin 1450 përpara Lindjes së Krishtit.
Substancat e ndryshme të përdorura për krijimin e parfumit, që u pagëzua nga studiuesit si "aroma e përjetësisë", u zbuluan falë përdorimit të teknikave të ndryshme shkencore të avancuara. Parfumet përbëheshin nga dyll blete, vaj vegjetal, yndyrna, bitum, rrëshira të llojeve të ndryshme, si edhe të një substance balsamike.
Studimi hedh dritë edhe për lidhjet tregtare që kishin egjiptianët e lashtë në mijëvjeçarin e II para Krishtit: Përbërësit e balsamit tregojnë qartë se egjiptianët importonin materiale nga vendet jashtë mbretërisë. Gjithashtu edhe se fisnikja e mumifikuar, Senetnai i përkiste rrethit të njerëzve më të afërt të faraonit.
Ndër përbërësit e importuar, autorët vënë në dukje rrëshirën e pemës së bredhit, që e sillnin nga veriu i Mesdheut, dhe një lloj rrëshire të quajtur damar, e nxjerrë nga pemë të cilat rriteshin në pyjet tropikale të Azisë Juglindore. Studiuesit zbuluan se egjiptianët e lashtë bënin tregti me vendet e Azisë Juglinore një mijë vjet përpara se sa mendohej deri më sot.
Parfumi i krijuar do të ekspozohet në muzeun danez të Kopenhagenit, "Mosegaard", e të gjithë vizitorët do të kenë mundësi që ta nuhasin.
Kjo do të jetë diçka unike për ta, pasi do të përjetojë një eksperiencë historike dhe të jashtëzakonshme./Zëri.ai
