TIRANË- Një parfum me vlerë 3.700 lekë është bërë shkak për nisjen e hetimeve nga Struktura e Posaçme Kundër Korrupsionit dhe Krimit të Organizuar. Ngjarja është regjistruar në dhjetor të vitit 2023, kur Arben Kotollaku, oficer i Policisë Gjyqësore të Elbasanit, ka hyrë në zyrën e prokurores Glenda Zeneli dhe i ka dhënë një parfum.
Dhuratën ia kishte dhënë Ismail Q., i cili ishte arrestuar në tetor për "drejtim të automjetit në mënyrë të parregullt" dhe ishte lënë në "detyrim paraqitje" nga prokurorja.
Ajo pretendoi se dhurata është kthyer, por gjithsesi SPAK ka nisur një hetim për këtë çështje. Oficeri ka deklaruar se parfumin ia ka dhënë koleges për respekt, pa pasur qëllim për të ndikuar në ndonjë çështje hetimore. Ndërsa vetë, Ismail Q.e mohon se është ai personi që i ka dhuruar parfumin hetueses. Pas një hetimi 1 vjeçar, Prokuroria ka arritur në përfundimin se nuk ka pasur asnjë qëllim për ndikim në çështjet hetimore./ZËRI
