BRITANI E MADHE- Këngëtarja me origjinë shqiptare, Dua Lipa duket se e ka mbyllur mjaft mirë vitin 2024 si në aspektin sentimental, por edhe në atë profesional dhe ekonomik. Ajo ka një pasuri prej mbi 100 milionë paundësh, pas fitimeve prej 12.2 milionë paundësh gjatë vitit 2024, falë performancës së saj në 'Glastonbury', albumit të ri dhe koncerteve të saj të ardhshme në Wembley, të cilat u shitën menjëherë.
Media britanike The Sun raporton se firma e saj "Radical22", e cila merret me shitjet e albumeve, ka realizuar një fitim prej 10.4 milionë paundësh, ndërsa "Radical22Live" për turnetë ka fituar 1.8 milionë paundë. Lista e pasurisë së "Sunday Times" e raportoi pasurinë e saj vitin e kaluar në 90 milionë paundë, por tani ajo ka arritur në 102.2 milionë paundë.
Këngëtarja gjithashtu përfiton shumë nga marrëveshjet e saj të sponsorizimit me markat Yves Saint Laurent, Versace dhe Evian mineral water.
Këngëtarja me origjinë shqiptare, u fejua pak ditë më parë me aktorin Callum Turner, 34 vjeç, pas një propozimi romantik gjatë festimeve të Krishtlindjeve./ZËRI
