TURQI– Sulmuesi i kombëtares shqiptare nga Kumanova, të cilin nuk e pamë ndaj Anglisë dhe Andorrës, Taulant Seferi këtë javë ishte sërish protagonist për Bodrumsporin, skuadrën e tij turke. Paraqitja në fushë ndaj Trabzbonsporit ishte përgjigjja më e mirë ndaj mungesës së ftesës nga Silvinjoja dhe sinjalit inkurajues që vetë trajneri i pati dhënë.
"Seferi ka një rrugëtim të mirë me kombëtaren, jep gjithçka në fushë. Por ne nisim një vit shumë të rëndësishëm, kemi një ëndërr për të shkuar në Botëror. Dua të jap një përgjigje për lojtarët e tjerë, si Seferi, Mehemti, mund të mos jenë ftuar, por mund të jenë pjesë e Kombëtares në sfidat e radhës,"- pati thënë trajneri për lojtarin e kombëtares.
Në ndeshjen ndaj Trabzonsporit, e vlefshme për Kupën e Turqisë, skuadra e Taulant Seferit u mund 3-2, por ai ishte më i miri i skuadrës së tij duke shënuar një gol dhe duke dhënë një pasim goli.
Njëzetë e katër ndeshje, 4 gola dhe 2 asiste ka regjistruar këtë vit kumanovari me Bodrum FK, që renditet e gjashtëmbëdhjeta, një pikë larg zonës së shpëtimit në kampionatin turk./ZËRI
