SHBA- Ish-zonja e parë e SHBA-së, Rosalynn Carter, gruaja e ish-presidentit Jimmy Carter, ka vdekur në moshën 96-vjeçare. Rosalynn vlerësohej gjerësisht për mendjemprehtësinë e saj politike, instinktet elektorale dhe punën në emër të Shtëpisë së Bardhë si e dërguar në Amerikën Latine.
Carter ishte e martuar për 77 vjet me Jimmy Carter, presidentin e 39- të të Shteteve të Bashkuara dhe fituesin e Çmimit Nobel për Paqen në vitin 2002, i cili tani është 99 vjeç. Carter iu përkushtua disa kauzave sociale gjatë jetës së saj publike, duke përfshirë programe që mbështesin burimet e kujdesit shëndetësor, të drejtat e njeriut, drejtësinë sociale dhe nevojat e të moshuarve.
Eleanor Rosalynn Smith lindi në Plains, Georgia, më 18 gusht 1927, i pari nga katër fëmijët e rritur nga Allethea Murray Smith dhe ëilburn Edgar Smith. Babai i Rosalynn-it vdiq kur ajo ishte 13 vjeç dhe nëna e saj u bë rrobaqepëse për të siguruar familjen e saj. Eleanor ishte një grua që u angazhua në politikë dhe përbënte krahun e djathtë të bashkëshortit të saj.
Në vitin 1982, ata themeluan Qendrën Carter, një organizatë jofitimprurëse për të drejtat e njeriut e krijuar në partneritet me Universitetin Emory në Atlanta. Shtatë vjet më vonë, ajo themeloi Institutin Rosalynn Carter për Kujdesin në Universitetin Shtetëror të Gjeorgjisë Jugperëndimore. Ajo shkroi disa libra, duke përfshirë kujtimet e vitit 1984 "First Lady From Plains" si dhe tre libra për shëndetin mendor.
