TIRANË- Lojtari i Kombëtares shqiptare të futbollit Taulant Seferi ka festuar dje mes shokëve të ekipit ditëlindjen e tij të 27. Në një video që ka postuar FSHF në rrjetet sociale, futbollisti shqiptar nga Kumanova, nuk ka lënë pa përmendur ndeshjen e rëndësishme që pret ekipin ditën e nesërme, përballë Moldavisë.
Dhe dëshira e shprehur nga Seferi është se dhuratën e dëshiron pas ndeshjes me Moldavinë. Një dëshirë që nënkupton kualifikimin në “Gjermani 2024”.
“Gjermania o vllazën, nuk është si përpara”, këndoi Seferi, një këngë që tashmë është bërë hit në grumbullimet e Kombëtares.
Nuk kanë munguar batutat dhe humori… Fillimisht sulmuesi ka deklaruar para shokëve të tij se me këtë këngë dëshiron të përshëndesë portierin Berisha, e më pas ka nisur të këndojë, e së bashku me të dhe gjithë ekipi.
Prej kohësh Kombëtarja shqiptare e futbollit ka shfaqur unitet dhe momente gëzimi jo vetëm në fushën e lojës, por edhe jashtë saj, me lojtarët që janë miq të mirë mes tyre.
