ITALI- Mesfushori i Juventusit, Paul Pogba thotë se është “i pikëlluar, i tronditur dhe i thyer” nga vendimi për t'u pezulluar për 4 vite nga fusha e blertë. Kjo pasi akuzohet se ka përdorur doping. Francezi, 30 vjeç, u pezullua përkohësisht në shtator pasi një test droge zbuloi nivele të larta të testosteronit në sistemin e tij.
“Gjithçka që kam ndërtuar në karrierën time profesionale më është hequr,”- tha ai në një deklaratë pas vendimit. Por megjithatë, ish-lojtari i Manchester United shtoi se do të apelojë vendimin.
Pogba u testua rastësisht pas ndeshjes së parë të sezonit të Juventusit më 20 gusht. Testi pozitiv u konfirmua nga gjykata kombëtare e antidopingut të Italisë, ndërsa zyra e prokurorisë antidoping kërkoi një pezullim 4-vjeçar.
Por pas vendimit Pogba e theu heshtjen, duke përsëritur pafajësinë e tij dhe duke njoftuar se do të vazhdojë të mbrohet.
"Si një atlet profesionist, unë kurrë nuk do të bëja asgjë për të përmirësuar performancën time duke përdorur substanca të ndaluara dhe nuk kam respektuar apo mashtruar asnjëherë kolegët atletë dhe mbështetësit e ndonjë prej skuadrave për të cilat kam luajtur."
Testosteroni është një hormon që rrit qëndrueshmërinë e atletëve. Sezonin e kaluar ai luajti 108 minuta në gjashtë ndeshje në Serie A, bëri tre paraqitje dhe një asistim në Ligën e Evropës dhe 11 minuta në Coppa Italia - gjithsej 162 minuta dhe asnjë gol./ZËRI
