TIRANË- Komitetit Ekzekutiv i UEFA-s i ka dhënë zyrtarisht të drejtën Shqipërisë që të bëhet një nga vendet organizatorë të Kampionatit Europian U-21 të vitit 2027. Ky turne, i cili do të zhvillohet në qershor të vitit 2027, do të përfshijë 16 skuadra që përfaqësojnë talentet e futbollit në Europë. Sa i përket vendimit të UEFA-s, presidenti i Federatës Shqiptare të Futbollit, Armand Duka pati një reagim duke u shprehur: Ky është një vendim shumë i rëndësishëm nga UEFA, sepse Kampionati Europian U-21 i vitit 2027 do të jetë më shumë sesa një turne futbolli. Ai do të shërbejë si një katalizator për të thyer barriera, për të forcuar mirëkuptimin e ndërsjellë dhe për të krijuar një të ardhme më pozitive për popujt e Shqipërisë dhe Serbisë. Ky turne do të tregojë gjithashtu se çfarë mund të arrihet kur njerëzit bashkohen rreth një objektivi të përbashkët, të frymëzuar nga fuqia e futbollit. Ky do të jetë eventi më i madh sportiv në historinë e Shqipërisë. Prandaj, ai na jep mundësinë që, me mbështetjen e UEFA-s, të modernizojmë stadiumet dhe infrastrukturën e futbollit në të gjithë vendin. Gjithashtu, ky organizim do të krijojë një trashëgimi të qëndrueshme për të frymëzuar brezat e ardhshëm të lojtarëve, vullnetarëve dhe tifozëve në të dyja vendet.
Një koment pozitiv kishte edhe sekretari i Federatës Serbe të Futbollit, Branko Radujko.
“Ky do të jetë turneu më i madh i futbollit në historinë e Serbisë, një ngjarje që do t’i tregojë botës se çfarë është e mundur kur njerëzit fokusohen në një qëllim të përbashkët, të frymëzuar nga fuqia e futbollit. Si i tillë, ai përfaqëson një trampolinë për përmirësimin e stadiumeve dhe ambienteve të tjera të futbollit në të gjithë vendin, me mbështetjen e UEFA-s. Do të krijohet një trashëgimi e qëndrueshme që do të frymëzojë brezin e ardhshëm të lojtarëve, vullnetarëve dhe tifozëve të futbollit në të dy vendet. Në fund të fundit, ne kemi ambiciet tona dhe besojmë shumë në gjeneratën e lojtarëve tanë të rinj që do të udhëhiqen nga trajneri Aleksandar Kolarov në këtë garë madhore. Besojmë gjithashtu se ky organizim do të jetë një prelud për të pritur ndeshjen finale të një kompeticioni evropian për klube, ndeshje që do të luhej në Stadiumin e ri Kombëtar,”- u shpreh Radujko.
Si një nga vendet pritëse, Shqipëria do të ketë për herë të parë mundësinë që të përfaqësohet me brezin e saj të ri të futbollistëve U-21 në një turne ndërkombëtar. Ndeshja hapëse do të mbahet në stadiumin “Karadorde” të Novi Sadit, ndërsa finalja do të luhet në stadiumin "Arena Kombëtare" në Tiranë. Ndeshjet që do të mbahen në Shqipëri do të zhvillohen në 4 stadiume: Arena Kombëtare në Tiranë, Elbasan Arena, Loro Boriçi dhe Arena Egnatia.
Grupe inspektimi të UEFA-s prej disa kohësh kanë vizituar Shqipërinë për të parë këto impiantë dhe për të rekomanduar përmirësimet e nevojshme për të pritur ndeshjet e finaleve të Europianit të 21-vjecarëve. Një ngjarje e tillë e vendos sërish vendin tonë në qendër të Europës sa i përket ngjarjeve futbollistike, edhe pse nuk ka kaluar pa polemikat e veta
E gjitha nisi pasi FSHF i dërgoi kërkesën UEFA-s, që Shqipëria të ishte një nga vendet pritëse të finaleve të këtij kompeticioni. Duke qenë se nuk plotësoheshin kushtet sa i përket numrit të stadiumeve që kërkohen në mënyrë që vendi ynë të priste të gjitha ndeshjet finale të Kampionatit Europian U-21, FSHF kërkoi bashkëpunim me Federatën Serbe të Futbollit. Kritikët u shprehën se Serbia nuk duhej ftuar për shkak të historikut mes dy vendeve. Por edhe pse kishte shumë zëra kundër, të gjithë u injoruan. Tashmë ka një vendim zyrtar; Serbia dhe Shqipëria do organizojnë Euro U-21./ZËRI
