LEVERSUKEN- Bajeri i Leverkusenit, një ndër pikat e forta që kishte në sezonin e shkuar ku arriti shumë pranë ‘’tripletës’’ sikur Atalanta të mos e ndalte në finalen e Ligës së Evropës, kishte mbrojtjen e zhdërvjellët, në mbulim dhe në organizim nga prapa. Këtë aftësi, për shumë arsye, këtë vit kampionët në fuqi as nuk e kanë rritur e as përmirësuar. Qendra e djathtë dhe qendra e majtë e mbrojtjes me tre lojtarë janë dy pikat e dobëta, të cilat këtë vit tërhoqën skuadrën përposhtë.
Këtë sezon, ende të pambyllur, deri më tani Bajeri i Leverkusenit ka pësuar 55 gola në 43 ndeshje. Vitin e shkuar pësuan 42 gola në 53 ndeshje. Në qendrën e djathtë, dyshja e vitit të shkuar, Kosonu dhe Stanishiç, çuditërisht u larguan të dy dhe në vendin e tyre, Mukieleja nuk solli dot cilësinë e nevojshme. Vitin e shkuar ishte identifikuar nevoja që të dublohej edhe Hinkapieja, si qendër e majtë. Belosiani, 20-vjeçari i talentuar francez, mbylli sezonin për një dëmtim të ligamenteve të gjurit ende pa u përshtatur me skuadrën e re. Në shkurt u afrua Hermozoja i Romës për të sjellë përvojën e tij, por edhe afrimi i tij rezultoi fatkeq: ai dëmtoi kafazin e kraharorit dhe po ashtu e ka mbyllur sezonin.
Sky Sport DE, për Gjermaninë, dje ka raportuar se Bajeri i Leverkusenit për vitin e ardhshëm po monitoron kosovaro-zviceranin Albian Hajdari. Hajdari, qendërmbrojtës i Luganos në kampionatin zviceran, shquhet si një nga mbrojtësit e rinj më të talentuar të kampionatit të atjeshëm. Më 25 mars të këtij viti ai bëri edhe debutimin me kombëtaren zvicerane. Mbrojtësi Hajdari, 21-vjeçar është thirrur dhe aktivizuar rregullisht nga të gjitha kombëtaret e moshave zvicerane. I rritur te grupmoshat e Bazelit, ai pati një përvojë edhe me Juventusin U19 dhe Juventus Next Gen. Në prill të vitit 2023, për 750 mijë euro, Luganoja e bleu pikërisht nga Juventusi. 33 ndeshje dhe 2 gola ka regjistruar me Luganon deri më tani. Vlera e kartonit të tij sillet rreth 10-15 milionë euro. Në fundin e këtij sezoni, përveç mungesave të tjera, skadon kontrata edhe për qendërmbrojtësin e Bajerit, kollonë e skuadrës dhe lojtar i kombëtares, Xhonatan Tahun./ZËRI
