HIMARË- Kandidati i koalicionit "Bashkë fitojmë", Petro Gjikuria ka shprehur bindjen se do të fitojë zgjedhjet e Bashkisë Himarë, teksa u shpreh se “unë do të jem kryetari i ardhshëm”. Pasi votoi në Dhërmi, atje ku edhe ka vendbanimin, Gjikuria u shpreh besimplotë se do të jetë ai fituesi. Ndërsa lidhur me problematikën e karteve të skaduara të identitetit, në fjalën e tij, Gjikuria tha se nuk e kishin pritur që të ishte problem, pasi zgjedhjet e shkuara ishin lejuar. Por megjithatë shtoi se sërish edhe ky problem nuk do ta ndajë nga fitorja.
PJESË NGA PRONONCIMI:
Nëse nuk fitoni do të prisni biletën për në SHBA apo do të pranoni ofertën e Tavos?
Gjikuria: Kjo është një ditë feste, le ta festojmë të gjithë bashkë. Kjo është dita e demokracisë. I ftoj bashkëfshatarët e mi që të shkojnë drejt kutive të votimit, le të fitojë më i mirë, le të fitojë demokracia. Se çfarë do bëjmë nesër, e flasim të hënën. Mos të fillojmë me pyetje të tilla, sikur keni ngrënë limona që me mëngjes. Unë do jem kryetari i ardhshëm i Bashkisë së Himarës.
Kartat e skaduara të identitetit?
Gjikuria: Vitin e kaluar u lanë njerëzit dhe votuan edhe me karta të skaduara. Kurse këtë vit jo, ky është një problem se edhe trajtimi...socialistëve u jepnin kartat brenda gjysmë ore, ndërsa anës tjetër i thoshin dy javë. Nuk mendoj se do të ndikojë në rezultat. Koalicioni "Bashkë fitojmë" do të fitojë këtë herë, do fitojë demokracia. Ne nuk na lanë kohë që të bëjmë fushatë. Kjo nuk është punë fushate. Ne 1 javë kohë fushatë na lanë, kam bredhur fshat më fshat. Kemi folur me banorët. Nuk ishte problemi i kartave. Kartat e skaduara vitin e kaluar i lanë, këtë vit jo. Këtu i bëjnë ligjet si të duan vetë. Vitin e kaluar doli ligji. Sot llogarisin numrat dhe i nxjerrin ligjet si të duan. Faleminderit, të jeni mirë, ditët në vijim do të kemi më shumë takime.
Gara zhvillohet mes Vangjel Tavos që kandidon nën siglën e PS dhe kandidatit opozitar Petro Gjikuria. Zgjedhjet e 4 gushtit në Himarë vijnë pas burgosjes së ish-kryebashkiakut të zgjedhur Fredi Beleri dhe dënimit të tij nga gjykata me dy vjet heqje lirie për blerje votash./ZËRI
