TIRANË- Kryebashkiaku i zgjedhur i Himarës Vangjel Tavo ka zbuluar se rivali i tij nga Opozita Petro Gjikuria, e ka telefonuar pas daljes së rezultatit të zgjedhjeve për ta uruar për fitoren. Në një postim në profilin e tij në Facebook, Tavo shkruan se për këtë arsye është ndjerë i keqardhur kur ka parë postimin e Gjikurias me akuzat për votat në Himarë. Tavo i kërkon kandidatit të Opozitës që ta rimendojë edhe njëherë ofertën e tij për ta qeverisur bashkë Himarën, ose të largohet i qetë në Shtetet e Bashkuara të Amerikës, pasi vendlindjen, sipas tij, do ta lërë në duart e sigurta. Përsa u përket akuzave për mohimin e votës për qytetarët që u kishte skaduar karta e identitetit, Tavo thotë se ata kanë qenë votues të të dyve dhe kurrsesi nuk kanë nga ta dinë si do ta ndryshonin rezultatin.
Postimi i Tavos:
I dashur Petro, Sot Himara kishte një arsye të madhe për t’u gëzuar sepse ishte ajo fituesja e 4 gushtit, sikurse edhe unë e kisha dhe e kam zemrën plot nga mesazhet e pafundta të urimeve nga shumë e shumë banorë të Himarës, e mbështetës brenda e jashtë vendit. Por, një shkëndijë më shumë e këtij gëzimi ishte edhe telefonata juaj e urimit e para pak orëve. E vlerësova shumë dhe e pranova sinqerisht si një akt qytetarie dhe si sjellje e një njeriu me mendësi të hapur perëndimore, por, pa e mohuar, e prita edhe me shpresën se po më telefonoje për të pranuar ftesën time publike për t’iu bashkuar programit tonë të drejtimit të Bashkisë Himarë në pozicionin e zëvendëskryetarit. Por, pritshmëria ime e lartë ndaj teje zgjati vetëm pak e tani jam i keqardhur për reagimin tënd, a thua se Himara është një fushë betejash ku përballen ushtri armike dhe jo alternativa politike dhe qytetare, si në të gjithë Shqipërinë demokratike.
Të kujtoj i dashur, se këtë herë në Himarë pati më shumë votues se sa vjet, kur qeveria e kishte shtyrë afatin e skadimit të kartave të identitetit. Dhe rezultati është ky që është, produkt i vullnetit të lirë të qytetarëve, ndërkohë që nuk pati se as nuk kishte si të kishte mijëra zgjedhës të cilëve iu mohua e drejta, pasi koha e votimeve 99.99% ka ikur me diktaturën.
Po, e vërtetë! Pati disa dhjetra qytetarë, votues të tutë dhe të mitë, që nuk mundën të votonin për shkak të dokumentave të skaduar të idenditetit, për të cilët kush e dëgjoi thirrjen e ministrisë së brendshme dhe e rinovoi mundi edhe të votonte normalisht. Prandaj i dashur Petro, unë të përsëris ftesën time që të mos largohesh andej nga erdhe, po të qëndrosh bashkë me mua në krahun tim, në pozicionin e nënkryetarit të bashkisë. Do të isha shumë i nderuar nëse do ta pranoje propozimin tim, ndërsa në rast të kundërt të uroj megjithë zemër rrugë të mbarë për Amerikë dhe suksese atje. Por në të gjitha rastet le të mbetemi në kontakt dhe për Himarën mos u shqetëso, sepse është në duart të sigurta dhe ka mbështetjen e padiskutueshme të Edi Ramës dhe Partisë Socialiste.
Sinqerisht
Vangjel Tavo
Pak orë më parë, Kandidati i Opozitës për Bashkinë Himarë, Petro Gjikuria u shpreh se nuk do ta ndalë me kaq betejën për Himarën. Në një reagim, Gjikuria shkruante se Vangjel Tavo do t'i shërbejë interesave të kryeministrit Edi Rama. Ai shkruan në postim se Partia Socialiste e fitoi Bashkinë Himarë pasi transformoi listën e zgjedhësve dhe nuk lejoi të votonin qytetarët me kartat e identitetit të skaduara.
