TIRANË-Kryeministri Edi Rama ka komentuar "kërcënimet" e opozitës se nëse nuk realizohen kërkesat e tyre për Komisionet Hetimore atëherë do të futen në grevë urie. Kreu i qeverisë deklaroi se nëse opozita e vendos diçka të tillë ai nuk do të bëjë asgjë për ta ndaluar pasi sipas tij, ky është një vendim sovran.
Edi Rama: Greva e urisë është një vendim sovran i dikujt që do të bëjë grevë urie. Ne nuk e ndalojmë dot. Përse të negociojmë? Për bukë apo për ujë?
I pyetur në "Report Tv" për grevën e mbajtur nga socialistët në vitin 2010, Rama tha se arsyet nuk kanë asnjë lidhje.
Edi Rama: Për çfarë kemi qenë ne në grevë urie? Për diçka që sot as nuk diskutohet, që ne ia kemi dhënë opozitës. Kur ishim ne në opozitë, lideri i grupit merrte fjalën njësoj si gjithë të tjerët dhe nuk kishte mundësi të fliste asnjë minutë më shumë.
Opozita e vendit prej disa kohësh ka kërkuar ngritjen e Komisioneve Hetimore, për një sërë çështjesh. Mosplotësimi i këtyre kërkesave solli dhe kaosin në Kuvend, ku deputetët opozitarë bllokuan Komisionet parlamentare dhe seancat plenare. Ndërkohë, kjo situatë mund të agravohet deri në futjen në grevë urie nga ana e opozitës./Zëri.ai
