TIRANË- Deputeti i Partisë Demokratike, Agron Shehaj ka vendosur largimin nga 'e djathta'. Lajmin e ka bërë me dije vetë Shenaj në një intervistë të dhënë për emisionin 'Opinion'. Shehaj tha se shkak për largimin kanë qenë konfliktet e brendshme të PD, ndërsa shtoi se ka nevojë për një zgjidhje të re. Por i pyetur nëse kishte në plan krijimin e një lëvizje të re, Shehaj preferoi që të mos jepte asnjë koment. Për këtë çështje, deputeti tha se do të fliste në një moment të dytë.
"Është e vërtetë që nuk kam qenë aktiv. Nuk ka asnjë hatëmbetje. Nuk ka asnjë zënie. Unë e mendoj ndryshe. Nuk jam dakord me vendimet që janë marrë këto kohë. Ne dolëm me një rezultat nga zgjedhjet lokale ku humbën bashkitë më të mëdha. Ka një mungesë shprese dhe besimi nga ana e votuesve tanë. Ajo që unë propozoj është që ne të japim zgjidhje. Ne nuk duhet të bëjmë sikur nuk shohim. Mendoj që ne duhet t’i japim elektoratit një alternativë të besueshme. Nuk bëhet fjalë për PD-në e Bashës.
Ne duhet t’i japim elektoratit një zgjidhje. Kam folur me Berishën, por nuk më ka bindur. Unë këto shqetësime i kam ngritur. Kam që nga vera e kam ngritur këtë çështje. Duhej të afronim figura të reja, nuk duhej t’i shkonim nga pas vulës. Ne duhet t’i japim zgjidhje. Mund të ishte një parti e re. Për momentin jam deputet i opozitës, por nuk jam deputet i Partisë Demokratike. Nuk jam as pjesë e grupit të Gazmend Bardhit. Ishte ai që më përjashtoi në fillim nga grupi. Nuk jam më pjesë e PD-së. Unë parti të re? Nuk është momenti për të folur për këtë,"- tha Shehaj.
