VLORË- Mbledhja e Këshillit Bashkiak të Vlorës u shoqërua me tensione mes këshilltarëve demokmratë dhe socialistë. Shkak për këtë ishte kalimi i një sipërfaqe toke në favor të një firme ndërtimi. Kjo është hera e dytë që për këtë çështje ndodhin debate në Këshillin Bashkiak. Toka ndodhet në Lungomare dhe është objekt i një procesi gjyqësor, pasi fillimisht u kërkua të kalonte në pronësi të bashkisë së këtij qyteti dhe më pas kompanisë ndërtuese “Lazaj 2002”.
Por demokratët hodhën dyshime për procedurën e zhvilluar për kalimin e pronësisë së tokës, pasi kjo sipërfaqe nuk mund t’i kalojë ndërtuesit pasi ka pronarë në proces. Demokratët akuzuan juristin e Bashkisë, Dorian Demiri, pasi sipas tyre kishte bërë kërkesa të pamatura për regjistrimin e një sipërfaqeje më të madhe se ajo reale.
Para votimit, kryetari i bashkisë dhe juristi u larguan nga salla, por juristi u thirr sërish për të qenë pjesëmarrës. Por ajo që befasoi në procesin e votimit ishte se jo vetëm këshilltarët e djathtë, por edhe ata të majtë abstenuan. Kryetarja e Këshillit pretendoi se vendimi kaloi, por këshilltarë kontestuan këtë duke theksuar se votat nuk ishin të mjaftueshme për të kaluar vendimin, pasi nevojiten 26 vota.
Pjesë nga debati:
Kryetarja e Këshillit: Atëherë ju lutem, meqënëse po hapet një temë dhe po bëhet shumë… tani mos vendosim në siklet as sekretarin e Këshillit Bashkiak që merret me numërimin e votave dhe askënd tjetër në këtë Këshill, se gjithsesi prej jush është i lirë të votojë dhe të shprehë mëndimin e tij ashtu si ai dëshiron.
Kryetarja e Këshillit: Dëshironi dhe njëherë ta kalojmë për votim?
Këshilltarët: Jo
Kryetarja e Këshillit: Të jemi të qartë. Kemi 3 apstenim. Sa të tjerë ishin pro sa janë kundër, bëjnë diferencën dhe i numërojmë në rregull, se është vendim me shumë siklet.
Këshilltarët kundërshtojnë
Kryetarja e Këshillit: Dakord po japim vendimin definitiv. Ky preventim me 25 vota më vjen keq por nuk kalon.
Pas numërimit të kartonave, rezultoi se votat nuk e përmbushnin kuorumin, dhe për pasojë, propozimi për kalimin e tokës fillimisht për bashkinë dhe më pas për kompaninë ndërtuese dështoi. /ZËRI
