TIRANË-Kryeministri Edi Rama prezantoi sot programin elektoral të Partisë Socialiste për zgjedhjet e 11 majit. Rama kërkon mandatin e 4 radhazi qeverisës.
Pikat kryesore të programit Shqipëria 2030, Edi Rama:
-Paga mesatare në 2013 ishte 332 euro, do ta çojmë në të paktën 1 mijë euro
- Paga minimale ishte 157 euro, në 2024 shkoi 400 euro, nga janari 2026 do jetë 500 euro
Shqipëria 2030 do të ketë një prodhim të përgjithshëm prej 35 miliardë €
-Pensioni mesatar ishte 86 euro, në 2024 u bë 175 euro, në 2030 do të shkojë në 400 euro
- Paga mesatare e mësuesve ishte 420 euro, sot është 950 euro, në 2030 do shkojë 1250 euro
-Brenda mandatit të katërt duam të mbyllim marrëveshjen me Greqinë për njohjen e pensioneve
-Deri në 2029, Shqipëria do jetë i vetmi vend me zero taksë për biznesin e vogël në rajon
- Paga mesatare e mësuesve ishte 420 euro, sot është 950 euro, në 2030 do shkojë 1250 euro
-Për bizneset do të mobilizojmë mbi 2 miliardë euro! 1 milard euro nga paketa Smart Albania
-200 shkolla të reja, paga mesatare e mësuesit nga 950 euro do shkojë 1250 euro
- Programe After School dhe ushqim për fëmijët. Monitorim në shkolla me kamera inteligjente. Transport falas nxënësve nga shtëpia në shkollë dhe anasjelltas
-300 milionë euro për strehimin social. 50 mijë banesa për të rinjtë dhe profesionistët. Do ngrihet kampusi i Universitetit të Durrësit
Rama, gjatë prezantimit të programit “Shqipëria 2030” ditën e sotme ka premtuar se paga minimale nga janari 2026 do të jetë 500 euro.
Edi Rama:Të ardhurat për frymë në tre mandate i kemi trefishuar kur morëm detyrën, të ardhurat për frymë ishin 3324 euro, sot të ardhurat për frymë janë 10342 euro dhe në Shqipërinë 2030 të ardhurat për frymë do të 5-fishohen në raport me nga u nisëm dhe do të jenë 15 mijë euro. Paga mesatare në sektorin publik ishte 372 euro. Sot, në vlerësimin e fundit të pavarur të bërë nga INSTAT-i të konfirmuar nga organizatat financiare ndërkombëtare, paga mesatare për vitin 2024 në sektorin publik u mbyll 1 mijë euro, ndërsa në Shqipërinë 2030, do të jetë të paktën 1200 euro. Pagën mesatare të përgjithshme e rritëm më shumë se 2 herë e gjysmë dhe do ta rrisim të paktën 30% më shumë. Sot, 2024 u mbyll me pagën minimale 400 euro dhe duke filluar nga janari 2026 me një vendim që do të merret pas zgjedhjeve kur do të bëhet edhe akti normativ i qershorit, paga minimale do të jetë 500 euro.
ARSIMI
Kryeministri Edi Rama premton gjatë mandatit të 4 edhe 200 shkolla të reja, ndërsa tha se deri më tani janë ndërtuar 450 shkolla të reja. Paga mesatare e mësuesit synohet që të shkojë nga 950 euro në 1250 euro. Rama tha se brenda mandatit të karter do të ketë një program pas shkollor për fëmijët duke përfshirë dhe ushqimin falas, në mënyrë që prindërit të mos jenë të detyruar të ndërpresin punën dhe angazhimet e tyre për të marrë fëmijët nga shkollat, çerdhet apo kopshtet.
Edi Rama: Brenda mandatit të 4 numri i laboratorëve inteligjentë do të jetë 1 mijë. Brenda mandatit të katërt do të nisë programin e ushqimit në shkolla, po ashtu do të nisë dhe një program pas shkollor i cili është një hap tutje, sepse aty ku do të jetë ushqimi, do të jetë dhe mos shqetësimi i prindërve për të lënë punën dhe për të marrë fëmijën nga shkolla. Brenda vitit 2026 shkollat do të monitorohet nga kamera inteligjente. Është një projekt i nënshkruar, i financuar dhe tani ngelet vetëm zbatimi. Gjatë mandatit të 4 do të dyfishohet numri i nxënëseve në arsimin profesional. Objektivi është që në Shqipërinë 2030, 35% e numrit të nxënësve të studiojnë në shkolla profesionale. Paga mesatare e mësuesve. Paga mesatare e mësuesve është dyfishuar krahasuar me kohën kur ne e morëm detyrën. Ishte 420 euro në vitin 2013 dhe sot është 950 euro. Ndërkohë që në Shqipërinë 2030, mësuesit do të kenë një pagë mesatare 1250 euro.
MJEKËSIA
Kryeministri Edi Rama deklaroi se gjatë mandatit të katërt, Qendra Spitalore Universitare “Nënë Tereza” do të arrijë një nivel të ri cilësie falë bashkëpunimeve me qendrat më të mira mjekësore në botë. Ai theksoi se 90% e QSUT-së është transformuar dhe tashmë ka fituar respekt ndërkombëtar, ndërsa hapi i ardhshëm do të jetë krijimi i një sinergjie me institucionet më prestigjioze.
Duke prezantuar këtë program për çdo sektor, kryesocialisti u ndal edhe tek mjekësia. Rama foli për pagat e mjekëve dhe infermierëve, duke theksuar se janë rritur nga viti 2013 kur morën detyrën për herë të parë. Megjithatë, Edi Rama tha se deri në vitin 2030, pagat e mjekëve do të prekin nivelin 2000 Euro.
Edi Rama: Në Shqipërinë 2030 ne duam që paga e mjekëve të shkojë të prekë tavanin e 2000 Eurove. Paga e infermierëve, edhe ajo 280 Euro në 2013. 850 Euro sot. Mos harrojmë në të gjitha këto paga ka një ndryshim të madh, sepse nuk kanë të gjitha pagat nën 1000 Euro, nuk kanë barrë që kishin. Gjatë mandatit të katërt, Qendra Spitalore Universitare “Nënë Tereza”, e cila sot është transformuar thelbësisht në 90% të saj, e cila sot ka fituar respekt dhe e cila sot është gati për të bërë hapin tjetër, do ta bëj hapin tjetër duke krijuar një sinergji me disa nga qendrat më të mira të botës. E kemi nisur me Qendrën Spitalore Universitare SHEBA të Izraelit e rankuara e 9 në botë, që ka marrë drejtimin e Onkologjikut dhe që ka filluar një punë intensive edhe sot që flasim mjekët tanë, një numër i konsiderueshëm mjekësh janë atje në një trajnim intensiv për ta kthyer Onkologjikun nga një vend ku patëm një krizë, e cila na lëndoi të tërëve në një pikë referimi për të qenë krenar. Dhe në ndërkohë jemi në diskutime edhe me dy qendra të tjera dhe parashikojmë shumë shpejt që të kemi partnerët e duhur në mënyrë që Qendra Spitalore Universitare dëgjojeni me vëmendje të jetë pika ku shqiptarët që nisen jashtë vendit për të marrë një shërbim spitalor, mos kenë nevojë, mjafton të shkojnë atje. Dhe të jetë një qendër që në Shqipëri e 2030 do të jetë prestigj ndërkombëtar i Shqipërisë për shërbimin shëndetësor.
BUJQËSIA
Kryeministri Edi Rama premton se gjatë mandatit të katërt, priten të realizohen 1000 projekte të tjera të fokusuara në zhvillimin e sektorit bujqësor dhe agroturizmit. Gjatë mandatit të katërt ne do ta çojmë në afro 500 milionë vlerën totale të investimeve në bujqësi dhe synojmë të arrijmë objektivin super-ambicioz të 1 miliardë euro eksporteve.
Edi Rama: Janë 1000 projekte të tjera që do të realizojmë gjatë mandatit të katërt dhe janë projekte që dimë ekzaktësisht në cilat drejtime dhe të gjithë ju nëpër qarqe do duhet t'i trajtoni specifikisht. Po toka? Toka, kur ne e morëm detyrën, sipërfaqja e tokës ujitshme kishte dy herë e gjysmë më e vogël se sot, pra sot, - që sipas kënetës kanë ikur të tërë nga Shqipëria, - janë 300 mijë hektarë tokë që punohen sepse ujiten, - kur sipas kënetës, të gjithë ishin këtu në Shqipëri, - ishin vetëm 120 mijë hektar tokë. 300 mijë hektar sot ujiten, kullohen, por mbeten dhe 60 mijë hektarë të tjerë për ta përmbyllur të gjithë projektin e ujitjes së çdo pëllëmbe tokë diellore të punueshme në Shqipëri.
MBROJTJA SOCIALE
Rama është shprehur se qeveria ka trefishuar buxhetin e ndihmës ekonomike dhe ka katërfishuar fondet për shërbimet e përkujdesjes sociale, duke zgjeruar mbulimin e tyre në të gjithë territorin. Kreu i qeverisë premton se nga janari i vitit të ardhshëm do të nisë një ndihmë e posaçme për fëmijët me aftësi të veçanta, veçanërisht ata me autizëm, për të siguruar një trajtim më të drejtë dhe të personalizuar.
UJI DHE ENERGJIA ELEKTRIKE
Kryeministri Edi Rama u shpreh se në mandatin e katërt, Shqipëria do të bëhet e pavarur energjetikisht dhe do të mund të eksportojë energji. Rama deklaroi se 10% e prodhimit është fotovoltaik, dhe pritet që deri në vitin 2030 kjo të arrijë në 30% Sa i përket furnizimit me ujë, Rama premtoi se brenda mandatit të katërt 90% do të ketë ujë 24 orë, për zonat e largëta malore që përbëjnë 10% të rasteve e pamundur zgjidhja.
