TIRANË-Ministri Ermal Nufi ka reaguar për herë të parë pas akuzave të bëra ndaj tij nga ish-zëvendëskryeministri Arben Ahmetaj gjatë një interviste në emisionin “Çim Peka Live”. Ahmetaj duke ndarë një audiopërgjim, ngriti një sërë akuzash, mes tyre për një skemë të trafikut ndërkombëtar të armëve, ku përfshihet Shqipëria.
Ish-zv.kryeministri nga arratia deklaroi se disponon informacione dhe materiale që, sipas tij, lidhen me një strukturë të organizuar për trafikimin e armëve, duke pretenduar se armët vijnë nga vende të Afrikës, paketohen në Shqipëri dhe më pas dërgohen drejt destinacioneve të tjera. Ahmetaj foli edhe për tenderët publikë, ku sipas tij hynte në rol edhe "Ermal Raketa", duke iu referuar ministrit Ermal Nufi. Bëhet fjalë për një tender me vlerë 14.4 milionë euro për avionë zjarrfikës, për të cilin Ahmetaj ngre pikëpytje mbi mënyrën e zhvillimit të procedurës dhe personat që, sipas tij, lidhen me të.
Gjatë një prononcimi të shkurtër për gazetaren Ambrozia Meta, teksa ishte duke u futur në mbledhjen e kryeministrit Rama me qeverinë dhe drejtuesit politikë të PS-së në “Vilën e Kuqe” në Sauk, Nufi ka mohuar pretendimet e Ahmetajt. Ministri ka mohuar akuzat për trafikun e armëve, ndërsa, sa i përket audiopërgjimit, ai tha se nuk e ka dëgjuar, teksa u shpreh: “Përgjimet e dynjasë do dëgjoj unë?”
Gazetarja: Në lidhje me audiopërgjimin…, jo se po aludojnë për trafik armësh.
Ermal Nufi: Çfarë trafiku armësh? A jeni në terezi? Nuk ka…
Gazetarja: Po, kështu thotë përgjimi…
Ermal Nufi: Përgjimet e dynjasë do dëgjoj unë?
Gazetarja: Jepni një sqarim publik
Ermal Nufi: Asgjë
