Beleri dhe premtimet për shqiptarët/ MESAZHET e takimit të shumëpërfolur të Ramës në Athinë
GREQI- Në një takim që zgjati pak më shumë se një orë, në një sallë të mbushur me shqiptarë dhe flamuj kuqezi, kryeministri Edi Rama, nuk i shpëtoi komentin për situatën në të cilën ndodhet sot Shqipëria dhe Greqia. Edhe pse pa e pëmendur në mënyrë direkte, Rama komentoi çështjen Beleri, ku tha se asnjë anëtari të komunitetit grek në Shqipëri, nuk i janë shkelur të drejtat për shkak të përkatësisë etnike.
“Duhet të bëjmë ende më shumë për ta, por e vërteta e madhe jashë lojërave politike me topin katror ballkanik, është se asnjë hall i tyre nuk i ndryshëm nga hallet dhe problemet shqiptare. Ama kurrë asnjë rast një grek etnik në shqiptarinë e 10 viteve të fundit nuk ka pasur asnjë hall apo problem për shkak të kombësisë së tij, kurrë. Në asnjë rast grekëve etnik nuk i është mohuar e drejta e tyre e besimit, e gjuhës, e pronës, kurrë. Asnjëherë në asnjë rast, qytetarëve grek të Shqipërisë nuk i është mohuar e drejta e votës apo e zgjedhjes. Nuk i është mohuar as e drejta e pronës. Prona është një problem për shqiptarët e Shqipërisë dhe jo vetëm për grekët në Shqipëri”, tha Rama, teksa iu përgjigjej të gjithë atyre që ishin treguar skeptikë mbi arsyet e vizitës së tij në Greqi.
Sa i takon çështjes së emigrantëve shqiptarë në Greqi, Rama tha se janë çelur negociatat në nivel ekspertësh për njohjen e pensioneve. Po ashtu, Rama ai foli edhe për marrjen e shtetësisë me natyralizim.
“Më në fund me qeverinë aktuale, se me ato më përpara, as bëhej fjalë, kemi çelur negociata në nivel ekspertësh për marrëveshjen e pensioneve me Greqinë, ndërsa deri dje nuk kishte asnjë dritë në fund të tunelit. Ajo marrëveshje me Italinë dhe kjo me Greqinë, janë dy marrëveshjet më komplekse për shkak të peshës që kanë. Po ashtu dhe besoj se kjo ju intereson shumë, kemi hapur edhe dialogun dypalësh në nivel teknik, për problematikën e lejeve të qëndrimit dhe për procedurën e marrjes së shtetësisë me natyralizim. Ka goxha progres dhe unë jam besimplotë se shumë shpejt, ju do të merrni lajme shumë të mira”, tha Rama.
Më tej, kryeministri Rama theksoi se është besimplotë se marrëdhëniet mes dy vendeve do të ecin përpara.
“Unë kam besim, se më e mira mes Greqisë dhe Shqipërisë është e gjitha përpara. Duhet t’i zgjidhim të gjitha çështjet mes nesh si europianë largpamës të shekullit të 21, por jo si ballkanas sylesh të shekullit të vjetër, për t’i kthyer sa herë hapen tezat e pazareve elektorale”, tha Rama.
Ndërkohë në disa raste gjatë fjalës së tij, Rama e vuri theksin te marrëdhënia e mirë që qeveria e tij ka pasur me Mitsotakis, përpara se mes dy vendeve të shtrohej çështja Beleri. Në përmbyllje të fjalimit, Rama la një mesazh për Mitsotakis, ku tha se Shqipëria do marrëdhënie normale me të gjithë fqinjët e saj, dhe nuk kërkon nxitjen e problemeve.
/ZËRI
Rama e mbyll fjalimin me një ‘pusullë’ për Mitsotakis: Kërkoj falje për gabimet, kurrë nuk kam tradhëtuar ata që më votuan
GREQI- Kryeministri Edi Rama e ka përmbyllur fjalimin e tij përpara emigrantëve shqiptarë në Athinë me një mesazh për kryeministrin grek, Mitsotakis. Rama tha se me qeverinë e drejtuar prej tij, Shqipëria ka arritur që të përparojë disa prej çështjeve që janë lënë pezull prej shumë kohësh mes dy vendeve tona. Rama zgjodhi një mesazh të Naim Frashërit, për të përshëndetur homologun grek, i cili në të njëjtën ditë që kreu i qeverisë shqiptare ndodhet në Athinë, është nisur për një vizitë zyrtare në Turqi.
“Përpara se të largohem dhe në pamundësi për ta takuar. Dëshiroj ti lë një pusullë mikut tim, të zgjedhur nga populli i këtij vendi, kryeministrit Mitsotakis. I dashur Kyriakos, në vitin 1986 poeti ynë Naim Frashëri shkruaji në greqisht vjershën e tij, “Dëshira e vërtetë e shqiptarëve”.
“Duam me të gjithë fqinjët, sllavë dhe grekë të jetojmë në harmoni, në vëllazërim. Me rend dhe paqe të jetojmë. Le të mos bëhemi armiq dhe të mos zihemi, mjaftojnë vuajtjet e shumta dhe tiranitë që kemi kaluar. Është koha e mirëqenies, është koha e lirisë! Shumë të fala nga unë dhe shqiptarët e Greqisë””, tha Rama në fund të fjalës së tij.
Ndërkohë që Rama kërkoi ndjesë për gabimet që mund të ketë bërë në këto 3 mandate të qeverisjes së tij, por tha se nuk e ka tradhtuar kurrë besimin e atyre që e kanë votuar.
“Unë nuk iki dot sot pa ju thënë edhe dy fjalë: Gabime unë mund të kem bërë plot në këto 10 vjet. Ju kërkoj ndjesë për cdo gabim që kam bërë, por kurrë në asnjë rast nuk i kam tradhtuar ata që më kanë besuar qoftë edhe njëherë me votën e tyre këtë nder të jashtëzakonshëm. Nuk ka nder më të madh që mund ti bëhet një njeriu në jetë sesa udhëheq vendin e tij. Nuk ka forcë materiale në këtë botë, fuqi politike, ekonomike, financiare, individ apo shtet që me josh apo më detyron të përkulem për të përfituar për veten pas shpinës tuaj. Për të cënuar interesat publike dhe private të shqiptarëve që unë nuk i njoh, apo për të përkulur majat e paprekshme të interesave kombëtare të Shqipërisë. Kjo ishte vizita ime më e bukur në Athinë dhe nuk besoj se do ketë më të bukur se kjo”, u shpreh kryeministri.
/ZËRI
Mes emocioneve, Rama përfundon fjalimin në Athinë, ulet në gjunjë përpara emigrantëve shqiptarë
GREQI- Në përmbyllje të fjalimit të tij përpara emigrantëve në Greqi, kryeministri Edi Rama është ulur në gjunjë përpara të pranishmëve. Rama nuk i ka fshehur emocionet, ndërsa në skenë është ngjitur dhe bashkëshortja e tij. Më shumë se 6 mijë shqiptarë ishin të pranishëm sot në stadiumin Galatsi në Athinë, ku dëgjuan mesazhet e Ramës, për marrëdhëniet mes Shqipërisë dhe Greqisë, por edhe vizionin që socialistët kanë për Shqipërinë e 2030-tës.
Kryeministri Edi Rama ka deklaruar se Shqipëria nuk ka asnjë pretendim ndaj Greqisë, veç respektit dhe kujdesit reciprok ndaj shqiptarëve që jetojnë në shtetin fqinj. Gjatë fjalimit të mbajtur në takimin në Athinë, Rama deklaroi se Shqipëria e sheh Greqinë si një partner të natyrshëm strategjik, qoftë për çështjet për tu zgjidhur mes nesh qoftë sfidash të mëdha të kësaj epoke të re. Gjithsesi, ai theksoi më tej se jo të gjitha dallimet janë sheshuar dhe shfaqet tek ndonjëri fantazma e paragjykimeve, por ajo kohë nuk do të kthehet më mbrapsht.
/ZËRI
Greqia ka ende në fuqi ligjin e luftës, Rama: Absurde, po të kishte vullnet do të ishte zgjidhur
GREQI- Kryeministri Edi Rama, gjatë takimit me emigrantët shqiptarë në Athinë, ka përmendur ligjin e luftës që është ende në fuqi, duke e konsideruar si absurde. Ai tha se nëse do ishte vullneti i mirë mes 2 palëve, atëherë kjo çështje do duhet të ishte zgjidhur pa kaluar dhe shumë vite të tjera, siç ka ndodhur deri më tani.
“Rri akoma në fuqi ligji i luftës se Greqisë me Shqipërinë, ai ligj i 10 nëntor 1940, përcakton c’bëhet me pronat dhe me shtetasit e vendeve në gjendje lufte, në 1947 Greqia ratifikon traktatin e paqes me Italinë ndërsa me Shqipërinë dekreti i ligjit të luftës dhe pasojat e ligjit të luftës mbeten në fuqi, sot e gjithë ditën, edhe pse në 1998 kanë miratuar traktatin e miqësisë, po si ka mundësi mes 2 shteteve që kanë nënshkruan një traktat miqësie, që janë bashkë në NATO të mos jetë shfuqizuar gjendja e luftës bashkë me pasojat e një ligji lufte të shfuqizuar 84 vite më parë. Në këto vite unë dhe qeveria jonë jemi përpjekur që ky absurditet të largohet nga tryeza e marrëdhënieve tona, gjithashtu jemi përpjekur që t’i adresojmë sa më drejtë, me mirëkuptim të gjitha çështjet e mbetura mes 2 shteteve sepse unë jam i bindur se nëse kanë vullnet të mirë të gjitha çështjet mund të zgjidhen pa kaluar 84 vite të tjera”, tha Rama.
Sa i takon mosmarrëveshjeve të fundit mes dy vendeve tona, Rama tha se ato nxiten nga politikat nacionaliste, që iu shërbejnë fushatave të ndryshme në mes dy vendeve tona.
“Duket sikur mes Shqipërisë dhe Greqisë ka pasur vetëm probleme, por jeta jashtë kafenesë së zhurmshme vazhdon normalisht, aktive dhe produktive. Eksportet shqiptare në Greqi janë rritur me 1,4% krahasuar me një vit më parë. Shqiptarët janë prej kohës të dashuruar me brigjet e magjisë së Greqisë, por anasjelltas gjithmonë e më shumë grekë po eksplorojnë Shqipërinë, ku ndjehen si në shtëpinë e tyre të dytë. Grekët do të jenë të mirëseardhur në Shqipëri, jo vetëm për të pushuar, por edhe për të punuar, hapur dyqane, e kompanie, për të përfituar nga një regjim taksash shumë më i ulët sesa ky në Greqi. Madje, Shqipëria është kaq mikpritëse për grekët sa nuk i krijon asnjë telash, përkundrazi i krijon të gjitha kushtet edhe ndonjë politikani të keqkuptuar grekë që vjen të protestojë atje dhe vjen humb zgjedhjet këtu. Bujrum”, u shpreh mes të tjerave Rama në fjalën e tij.
/ZËRI
Temperaturat e larta dhe ngarkesa e sallës, Rama shihet në djersë gjatë fjalimit në Greqi
GREQI- Teksa ka mbajtur një fjalim të gjatë përpara emigrantëve të mbledhur në stadiumin Galatsi në Athinë, kryeministri Edi Rama është parë i mbuluar nga djersët. Kushtet e ajrimit në sallë, por edhe temperaturat e larta, kanë bërë që Rama të shihet i djesitur, ndërsa të pranishmit prisnin me brohoritje fjalën e tij.
Gjatë fjalës së tij në takim, Rama falenderoi komunitetin shqiptar në Greqi, që ballëlartë kanë mundur që të kalojnë sfidat e emigrimit, dhe të përballen me dinjitet me vendasit. Në sallën e stadiumit Galatsi, kanë qenë rreth 6 mijë shqiptarë, ndërsa fjalën e Ramës e parapriu dhe një koncert me pjesëmarrjen e disa këngëtarëve nga Shqipëria. /ZËRI
Rama fton biznesmenët grekë: Investoni në Shqipëri, kemi taksa më të ulëta
TIRANË- Kryeministri Edi Rama, në fjalën e tij përpara emigrantëve shqiptarë në Greqi, tha se mes dy vendeve tona, nuk ka asnjë arsye për të pasur përplasje, përveç atyre që nxiten nga nacionalizmi i politikës së ditës. Rama iu bëri thirrje grekëve që të vijnë në Shqipëri për të hapur biznese, për shkak se sipas tij vendi ynë ka taksa më të ulëta.
Edi Rama: Duket sikur mes Shqipërisë dhe Greqisë ka pasur probleme të përjetshme. Ndërkohë jeta e përditshme jashtë kafenesë së zhurmmshme të interesave afatshkurta të politikës dhe përtej pasqyrave verbuese mediatike vazhdon normale, aktive dhe produktive. Greqia rendiet e treta në listën e partnerëve tregtarë të Shqipërisë. Falë angazhimit të operatorëve ekonomikë jemi në hapat e fundit të krijimit të dhomës së parë shqiptaro-greke të tregtisë dhe industrisë me seli në Athinë. Pritet miratimi i qeverisë greke për të hapur qendrën e kulturës shqiptare, për të cilën qeveria jonë ka lëvruar dhe fondet përkatëse. Numri i udhëtarëve që lëvizin drejt të dyja vendeve është dhjetëfishuar.
Shqiptarët janë prej kohësh të dashuruar me brigjet e Greqisë, por dhe anasajelltas. Gjithnjë e më shumë grekë po zbulojnë Shqipërinë turistike. Grekët kanë qenë janë dhe do të jenë gjithnjë të mirëseardhur në Shqipëri. Jo vetëm për pushime, por edhe për të punuar, hapur dyqane ngritur kompani, startuar linja investimesh për të përfituar nga një regjim taksash shumë më i ulët se në Greqi. Shqipëria i krijon të gjitha kushtet edhe ndonjë politikani që vjen të protestojë atje dhe vjen humb zgjedhjet këtu.
/ZËRI
Rama elektrizon shqiptarët: Nuk kam ardhur të takoj shërbëtorët e grekëve, por të zotët e kësaj shtëpie
GREQI- Kryeministri Edi Rama ka mbajtur fjalën përpara të pranishmëve në stadiumin Galatsi, në nisje të turit të tij të takimeve të diasporës. Në fjalën e tij Rama tha se shqiptarët e Greqisë tashmë janë të integruar, dhe nuk etiketohen më si shërbëtorët që iu shërbejnë të pasurve vendas. Sa i takon debateve mbi vizitën e tij në Greqi, Rama tha se ato i shërbejnë vetëm koreve nacionaliste.
Edi Rama:
Motra dhe vëllezër, mirëseugjej në shtëpinë tuaj të dytë, në Greqinë mike dhe fqinje, në këtë strehë kaq të madhe që ju e bëtë të duket kaq e vogël. Entuziasmi juaj më përul, por mbi të gjitha jeta dhe vepra juaj më mbushin me frymëzim dhe krenari për ju, njerëzit e zakonshëm nga të katërta anët e Shqipërisë.
Disa këtu në Greqi u çuditën, të tjerë u mërzitën, ndonjë edhe tha që unë nuk duhet të vija për vizitë te ju, por mbase kur ta shohin këtë shfaqje gëzimi familjar, ata do të kuptojnë që unë nuk kam ardhur që të takohem me shërbërorët e tyre të dikurshëm, por kam ardhur që të takohem me të zotët e barabartë të kësaj shtëpie.
Kam ardhur që të flas me qytetarët e barasvlefshëm të Greqisë demokratike, ku shqiptarët janë përfaqësuesit e një vendi krenar që është shqipëria jonë. Shqipëria e ka ngritur përfundimisht kokën e ulur nga dhuna e historisë së saj tragjike, dhe i sheh sot në sy që të gjithë me të njëjtin respekt që kërkon dhe meriton nga të gjithë. Ju shqiptarët e Greqisë jeni një vlerë e shtuar e punës, e dijes.
Marrëdhëniet tona kanë qenë shumë më të ngushta sesa janë lënë të duken nga pluhuri i politikës sonë. Edhe sot rrugët tona drejt së ardhmes janë lidhur pandarshmërisht, rrjetet sociale iu ofrojnë njerëzve sufllaqen e nacionalizmit, për të përgjumur trurin qytetar. Jeta e përditshme mes shqiptarëve dhe grekëve, jashtë kafenesë së zhurmshme të politikës, vazhdon normale, aktive dhe productive. Eksportet shqiptare u rritën vitin e kaluar, ndërsa Greqia renditen e treta në eksportet mes dy vendeve, jemi në hapat e fundit të krijimit të dhomës së tregtisë greke në Shqipëri.
/ZËRI
Në Galatsi flitet shqip, disa qytetarë protestë kundër Ramës: Lironi Belerin
GREQI- Në një kohë që në stadiumin Galatsi, këtë të dielë flitet shqip, vizita e Ramës është pritur me rezerva nga një pjesë e grekëve. Rreth 20 qytetarë grek dhe shqiptarë kryesisht nga Himara kanë protestuar ndaj vizitës së kryeministrit Edi Rama në Athinë.
Organizatori i tyre është dega e Rithemelimit në Athinë, ndërsa bien me sy parullat 'Lironi Belerin'.
Sakaq, emigrantët shqiptarë janë mbledhur në stadiumin 'Galatsi' në Athinë, ku presin kryeministrin Edi Rama.
Shqiptarët shihen me flamuj në duar e në sfond ka këngë me motive patriotike.
Qeveria greke pavarësisht rezervave për mbajtjen e këtij takimi përpara zgjedhjeve europiane të 9 qershorit, ka marre masa për mbarëvajtjen e tij.
Pas Athinës Rama do të jetë në Milano, Londër dhe Duseldorf për t’u takuar me shqiptarët që jetojnë në Itali, Mbretërinë e Bashkuar dhe Gjermani. /ZËRI
Noizy dhe Era Rusi ndezin skenën në Greqi, Rama pritet nga 6 mijë shqiptarë në sallë
GREQI- Rreth 6 mijë shqiptarë janë të pranishëm në stadiumin Galatsi në Greqi, ku po zhvillohet takimi i kryeministrit Edi Rama me diasporën. Para Ramës janë ngjitur në skenë këngëtarët Era Rusi dhe Noizy. Performanca e tyre ka qenë e shkurtër, por ka ndezur të gjithë të pranishmit në stadium.
"Ju falënderoj të gjithëve që keni ardhur këtu sot. Është gjëja më e mirë që mund të bëj për shqiptarët, të mblidhemi të gjithë bashkë dhe të jemi më të bashkuar se kurrë. Faleminderit kryeministrit që na mblodhi këtu. Jemi punëtore dhe meritojmë respektin e botës, të jemi të bashkuar gjithmonë sepse vetëm bashke mund t’ja dalim. Kjo këngë shkon për të gjithë ata që nuk kanë pasur besimin tek shqiptaret anë e mbanë botë”, tha Noizy gjatë performancës së tij.
Rama u prit me ovacione në sallë, ndërkohë që fjalimi i tij pritet që të përmbyllë takimin e sotëm.
Rama shoqërohet në Greqi nga pjesa më e madhe e kabinetit qeveritar, disa kryebashkiakë socialistë, si dhe gazetarë dhe personalitete të tjera të rëndësishme.
Turi i Ramës me diasporën do të vijojë më pas dhe në Itali, Britaninë e Madhe dhe në Gjermani.
/ZËRI
Live- I rrethuar nga dhjetra truproja, Rama mbërrin në stadium Galatsi, pritet me ovacione
GREQI- Kryeministri Edi Rama ka mbërritur në stadiumin Galatsi në Athinë, ku po mbahet takimi me shqiptarët që jetojnë dhe punojnë në shtetin fqinj. Rama është pritur me ovacione të shumta nga emigrantët e pranishëm, i rrethuar nga një numër i madh truprojash. Takimi ka nisur me himnin e flamurit, ndërsa Rama do tiu drejtohet më pas të pranishmëve me një fjalim, për vizionin e tij të Shqipërisë 2030.
Në shoqërinë e Lindës, Edi Rama mbërrin në Greqi, publikon pamjet e stadiumit të tejmbushur: Po vij
GREQI- Kryeministri Edi Rama, së bashku me bashkëshorten e tij Lindën, një pjesë e kabinetit qeveritar dhe disa kryebashkiakë socialistë kanë mbërritur në Greqi. Ata udhëtuan drejt Athinës me një prej avionëve të Air Albania, ndërsa paralelisht kanë dalë pamjet nga stadium Galatsi i tejmbushur me shqiptarë. Në këtë takim dominojnë flamujt kuqezi, ndërsa pjesëmarrja e shqiptarëve duket të jetë e konsiderueshme.
Pak pas orës 11:00 avioni që shoqëron kryeministrin Rama ka mbërritur në aeroportin e Athinës, ku forca të shumta policore po presin atë për ta shoqëruar në stadiumit Galatsi, ku do takohet me shqiptarët për të folur për vizionin e Shqipërisë 2030
Pamjet- Takimi i Ramës, mijëra shqiptarë jashtë stadiumit Galatsi, valëvisin flamujt kuqezi
GREQI- Mijëra shqiptarë pritet që të jenë të pranishëm në takimin që do të zhvillojë kryeministri Edi Rama, mesditën e sotme në Athinë. Mediat greke kanë publikuar pamjet nga jashtë stadiumit Galatsi, ku shqiptarër shfaqen në radhë për të hyrë në sallën e mbyllur ku do të mbahet takimi. Shumë prej tyre janë pajisur me flamujt kuqezi, të cilër valëviten në qendër të Athinës.
Kryeministri Edi Rama do të mbajë sot një takim me emigrantët shqiptarë në kryeqytetin e Greqisë, Athinë. Takimi pritet që të shoqërohet me masa ekstreme sigurie, ndërsa 1 mijë policë pritet që të jenë në terren për mbarëvajtjen e takimit. Fjala e Ramës do të paraprihet nga një performancë muzikore, ku do të jenë këngëtarër Noizy, Era Rusi dhe Ylli Baka. Rama pritet të shoqërohet në këtë takim nga pjesa më e madhe e kabinetit qeveritar. Sipas mediave greke, të pranishëm pritet të jenë 2 mijë qytetarë që kanë udhëtuar nga Shqipëria pikërishr për takimin e Ramës.
/ZËRI
Greqia në ‘këmbë’ për vizitën e Ramës, 1 mijë policë në terren, kontrolle me dronë nga ajri. 2 mijë pjesëmarrës nga Shqipëria
GREQI- Vizita e kryeministrit Edi Rama në Greqi këtë të dielë do të shoqërohet nën masa ekstreme sigurie. Edhe pse një vizitë e pretenduar private nga qeveria greke, policia do të jetë në këmbë për mbarëvajtjen e takimit të shqiptarëve që do të nisë në orën 11 të ditës së sotme në stadiumin Galatsi.
Për mbarëvajtjen e vizitës së Ramës në Greqi, pritet që të jenë të angazhuar 1 mijë punonjës policie, ndërsa e gjithë rruga që do të ndjekë kryeministri shqiptar nga aeroporti Eleftherios Venizelos deri në palestrën e mbyllur të Galatsit do të jetë e mbikqyrur.
Në të njëjtën kohë janë mobilizuar edhe helikopterët e EL.AS. si dhe dronët, të cilët do të japin një imazh të drejtpërdrejtë në qendrën operative, ndërkohë që është aktivizuar edhe rrjeti i informacionit i Policisë Helene.
Në takimin e Ramës sipas mediave greke do të jenë të pranishëm dhe rreth 2 mijë persona, që kanë hyrë në vendin fqinj në orët e fundit nga Shqipëria. Sipas mediave greke kjo është një strategji e ndjekur nga kryeministri shqiptar, për të siguruar mbushjen e sallës.
Programi i kryeministrit shqiptar
Sipas raportimeve, Edi Rama do të shoqërohet nga rreth 150 persona. Në këtë shoqërim do të jenë anëtarë të kabinetit të tij, deputetë dhe 50 gazetarë, të cilët do të shkojnë direkt në Teatrin e mbyllur të Krishtlindjeve të Galatsit. Krahas fjalës së planifikuar, kryeministri shqiptar gjatë ditës do të zhvillojë edhe takime me bashkatdhetarë, anëtarë të partisë së tij dhe biznesmenë, ndërsa pritet të shpërndajë broshura për marrëdhëniet dypalëshe. Pas përfundimit të takimeve, Rama do të pijë kafe me kolegët e tij në Galatsi, ndërsa në orën 6.00-7.00 pasdite do të shkojë në aeroport për t’u larguar nga Athina.
/ZËRI
Pak orë para takimit me shqiptarët, Rama vlerëson kryeministrin grek: Mik që gëzon respektin tim
TIRANË- Pak orë para takimit me shqiptarët në Greqi, kryeministri Edi Rama ka dhënë një intervistë për median greke Kathimerini. Teksa ka folur për marrëdhënien me kryeministrin grek, Rama është shprehur se se Kyriakos si kryeministër i Greqisë, dhe një mik që ai gëzon respekt për të, është vërtet i interesuar për forcimin e marrëdhënieve greko-shqiptare.
Rama bën dhe një herë me dije se vizita e tij e sotme në shtetin fqinj nuk gëzon motive konfliktuale mes dy vendeve, ashtu sikurse nuk lidhet me çështjen Beleri.
Kujtojmë se sot nis turin e tij të takimit me emigrantët, nga Kryeministri së bashku me kabinetin e qeverisë dhe deputetë të shumtë.
Data 12 maj, po kështu përkon me ditën kur një vit më parë u arrestua Fredi Beleri. Përzgjedhja e kësaj datë nga Rama sipas mediave greke, kishte si tendencë acarimin e marrëdhënieve mes dy shteteve, gjë të cilën Kryeministri shqiptar e ka mohuar, duke u shprehur se ardhja e tij në Greqi ka si qëllim takimin e shqiptarëve, e jo të krijojë konflikte me qeverinë greke.
Sot takimi i Ramës me shqiptarët në Athinë, masa të rrepta sigurie. Performon Noizy, Ylli Baka dhe Era Rusi
TIRANË- Do të mbahet sot në Athinë takimi i shumëpërfolur i kryeministrit Edi Rama me shqiptarët që jetojnë dhe punojnë prej vitesh në shtetin grek. Socialistët kanë bërë të gjithë përgatitjet për takimin që pritet të nisë në orën 11:00 dhe do të mbahet në stadiumin ‘Galatsi’, në sallën “Christmas Theater”.
Kreu i qeverisë pritet të mbërrijë në aeroportin “Eleftheros Venizelos” rreth orës 09:00 dhe për mbarëvajtjen e këtij takimi janë marrë masa të rrepta sigurie me qindra punonjës policie.
“Fjalimi i tij është planifikuar për në orën 11.30 dhe pritet të kthehet në Tiranë pasdite. Të paktën 2000 persona kanë udhëtuar nga Shqipëria drejt Greqisë gjatë ditës së djeshme për të ndjekur fjalimin e kryeministrit shqiptar në Klisto tou Galatsi”, shkruan protothema.
Takimi do të hapet me himnin kombëtar, ku do të ketë ngjyrime europiane dhe të Greqisë, vendi ku e mirëpret këtë takim. Me performancën e Noizyt, Ylli Bakës dhe Era Rusit do fillojë koncerti dhe në vazhdim Rama do u shpalosë bashkatdhetarëve të tij strategjinë dhe vizionin e tij për Shqipërinë e vitit 2030.
Rama do të shoqërohet në këtë takim nga një pjesë e kabinetit qeveritar, por edhe përfaqësues të mediave nga Shqipëria.
Pas përfundimit të takimeve, Rama do të pijë kafe me kolegët e tij në Galatsi, ndërsa në orën 18:00-19:00 pasdite do të shkojë në aeroport për t’u larguar nga Athina.
Rama në llogarinë e tij personale në Facebook ftoi shqiptarët që ndodhen në Athinë apo pranë kryeqytetit grek të marrin pjesë në tubimin që do të mbajë në Galatsi.
Kryeministri në postimin e tij foli për një “moment të rëndësishëm krenarie për të gjithë shqiptarët në Greqi”. Ftesa shoqërohet me një pamje nga Akropoli dhe flamujt e Shqipërisë dhe Greqisë.
Disa ditë më parë, Kryeministri grek Kyriakos Mitsotakis tha se vizita në Athinë e Ramës është e panevojshme, megjithatë shtoi se nuk mund ta pengojnë, pavarësisht thirrjeve të ndryshme që janë bërë nga grupe ekstremistësh. Pas Mitsotakis reagoi edhe Kryeministri Edi Rama, që theksoi se vizita e tij në kryeqytetin grek nuk ka lidhje me çështjet e brendshme të Greqisë, zgjedhjet për Parlamentin Europian apo ndonjë narrativë tjetër specifike që zgjon interesin e politikanëve grekë.
Kreu i qeverisë thotë se vizita e tij ka qenë e planifikuar prej kohësh dhe bëhet për t’u angazhuar me shqiptarët që jetojnë jashtë vendit e për të ndarë me ta krenarinë e atdheut dhe vizionin “Shqipëria 2030”. Në ndryshim nga Greqia, Shqipëria ka qenë gjithnjë e hapur për takimet e politikanëve grekë, siç do të ndodhë edhe sot, ku kreu i opozitës fqinje, do të vijë dhe do të takojë komunitetit grek në jug të vendit tonë.
/ZËRI
