“Kam investuar 250 dhe do fitoj 650 mijë euro”, zbardhen mesazhet e efektivëve të arrestuar në SKYECC, lista vijon dhe me zyrtarë të tjerë
TIRANË- Janë zbardhur mesazhet që efektivët e Policisë së Shtetit, të cilët u vunë në pranga me urdhër të Prokurorisë së Posaçme Kundër Korrupsionit dhe Krimit të Organizuar (SPAK), kanë shkëmbyer me persona të botës së krimit. Gazetarja e Top Channel Anila Hoxha ka publikuar mesazhet që në të cilat një trafikant tregon i shqetësuar “kam investuar 250 dhe do fitoj 650 mijë euro” dhe sipas tij po humbiste shumë, “megjithëse lidhjet i kam me shtet”.
Trafikanti shkruan se herë tjetër do veprohet jashtë vendit duke kujtuar dëmin qe i është bërë prej 1.7 milionë euro pasi iu bllokua në Greqi. Sipas gazetares së Top Channel, oficerët e arrestuar dhe një tjetër në kërkim, ndihmonin për dhënien e informacionit për aksionet antidrogë.
Ndërkohë që në listën e të kërkuarve që jetojnë jashtë dhe janë në kërkim nga SPAK përveç Kristo Qiricit janë edhe Benci Toska, Shkëlqen Kraja, Xhino Nebi, Luic Bala. Dy kryesorët nga hetimi i deritanishëm janë Kristo Qirici dhe Eldjon Alushaj, ndërsa në bisedat e Sky ECC nga të dyshuarit përmenden edhe emra të tjerë oficerësh të policisë si dhe zyrtarë.
Operacioni i SPAK u zhvillua dy ditë më parë. Në pranga janë vënë: Shkëlzen Ruska, me detyrë Shef i Seksionit për Hetimin e Krimeve në Komisariatin e Policisë Himarë; Ervis Alisinanaj, me detyrë Shef i Seksionit për Hetimin e Krimeve në Komisariatin e Policisë Lushnjë; ish-efektivi Erdit Hazizaj, kandidat i Berishës për kryetar bashkie në Roskovec më 2023, ndërsa Elvis Dervishi me detyrë Shef i Komisariatit të Policisë Kufitare Sarandë, është shpallur në kërkim.
U vra në Tiranë, Edmond Papa del në mesazhet e policëve të arrestuar, kush është Kristo që i lë takim tek hoteli
TIRANË- Janë zbardhur mesazhet që efektivët e Policisë së Shtetit, të cilët u vunë në pranga me urdhër të Prokurorisë së Posaçme Kundër Korrupsionit dhe Krimit të Organizuar (SPAK), kanë shkëmbyer me persona të botës së krimit. Gazetarja e Top Channel Anila Hoxha ka publikuar mesazhet që oficeri i policisë Shkëlqen Ruska përmes aplikacionit SKYECC ka shkëmbyer me të kërkuarin Kristo Qirici, kreu i një grupi kriminal i njohur ndryshe edhe si Jetmir Qirici (Hoxha).
Në një nga këto komunikime teksa flasin për një dhomë hoteli, Kristo shkruan që duhet të flasë me Mondin, që sipas SPAK është Edmond Papa, i cili u vra në Tiranë në dhjetor të vitit 2022. Ngjarja dyshohet se ndodhi për hakmarrje, pas atentatit me tritol ndodhur në të njëjtin vit në Tiranë, ku mbeti i vrarë Aleksandër Sadikaj, nip i fisit Kalemi në Memaliaj.
Oficeri Ruska në një rast tjetër kërkon ndërhyrjen e Qiricit nëse njihte ndokënd tek spitali infektiv pasi po dërgonte me urgjencë të atin i cili ishte prekur nga covidi. Ditë më vonë pasi i ati i ndërron jetë oficeri ngushëllohet nga Qirici.
Në vazhdën e ndihmave qe oficerët kanë ofruar është ajo e këshillimit që grupi të gjente lidhje pranë Shik sepse siç shkruan në Sky ECC një tjetër oficer policie “në 2016 dëmi për drogën kur u kultivua e bëri Shik sepse dërgonte informacione në polici dhe policia s’kishte çfarë të bënte”
Edhe shefi i policisë Elvis Dervishi që është identifikuar si përdorues i Sky flet me Qiricin dhe në biseda ata flasin për të ndërhyrë që oficeri të ngrihet në detyrë. Ndërsa ish-shefi i Sarandës Eljon Alushaj komunikon po në SkyECC në datën 17 shtator 2020, ditë në të cilën forcat Shqiponja ndalojnë shtetasin Xhino Murati. Ky shtetas ia lë armën kushëririt të tij mosha 15 vjeç.
“Kanë kapur Xhinon le ta mbajë ai i vogli 15 vjeç e ta nxjerrin Xhinon, i thamë nxirre. Kishin bërë postbllok nëntë veta të Shqiponjave tek Spitali”.
Më pas i njëjti oficer i shkruan duke e njoftuar “Doli Nojzi”.
