TIRANË- Dritan Goxhaj dhe Edison Lika janë lënë të lirë pas shoqërimit nga policia gjatë protestës së mbrëmjes së sotme në Tiranë. Dy aktivistët kanë dalë nga ambientet e komisariatit, ndërsa zhvillimet kanë vijuar me lëvizjen e protestuesve drejt strukturave të policisë.
Shoqërimi i Goxhajt dhe Likës u shoqërua me momente tensioni pasi disa protestues u përplasën fizikisht me efektivët dhe rrethuan furgonin e policisë, në përpjekje për të penguar largimin e tyre.
Pas këtyre momenteve protestuesit u drejtuan fillimisht përpara Drejtorisë së Policisë së Tiranës dhe më pas te Komisariati Nr. 2 ku kërkuan sqarime për shoqërimin e dy aktivistëve.
Ndërkohë një grup prej tyre është në takim me drejtorin e Policisë së Tiranës. Takimi vjen pas kërkesës së protestuesve për shpjegime mbi veprimet e ndërmarra nga efektivët gjatë tubimit./ZËRI
