SHKUP – Kryeministri i sapozgjedhur i Maqedonisë së Veriut, Talat Xhaferi i ka dorëzuar një shkresë kryetarit të parlamentit Jovan Mitreski, që në seancën e radhës do të shkarkojë dy ministra. Më konkretisht, pritet që të shkarkohen ministrat Azir Aliu dhe Fatmir Mexhiti.
“Kryetari i Qeverisë së Republikës së Maqedonisë së Veriut, Talat Xhaferi, dorëzoi shkresë deri te Kryetari i Kuvendit të Republikës së Maqedonisë së Veriut, Jovan Mitreski, në të cilën, në pajtim me nenin 94, paragrafi 2 i Kushtetutës së Republika të Maqedonisë së Veriut, i propozon Kuvendit në seancën e parë vijuese t’i shkarkojë: Fatmir Mexhitin nga pozita e ministrit të Shëndetësisë dhe Azir Aliun nga pozita e ministrit për Shoqërisë Informatike dhe Administratës.
Kryeministri Xhaferi i ka dërguar letër kryetarit të Kuvendit, Mitreski, që Kuvendi i Republikës së Maqedonisë së Veriut të zgjedhë: Ilir Demirin, për ministër që do ta drejtojë Ministrinë e Shëndetësisë dhe Naim Bajrami, si ministër i cili do të drejtojë Ministrinë e Shoqërisë Informative dhe Administratës”, thuhet në njoftim.
Talat Xhaferi u zgjodh kryeministër i qeverisë teknike të përkohshme në Maqedoninë e Veriut. Ai u bë kryeministri i parë shqiptar në RMV./ZËRI/
