MALISHEVË – Ish-kryetari i Komunës së Malishevës Isni Kilaj u arrestua me urdhër të Zyrës së Prokurorit Special në Hagë. Kilaj ka qenë komandant i UÇK-së gjatë luftës.
Në lidhje me këtë ngjarje, ka reaguar Komuna e Malishevës. Në reagimin e saj, komuna shprehet se janë të shqetësuar për arrestimin e ish-kryekomunarit.
Komuna e Malishevës shprehet se Specialja, në kuadër të arrestimit të Kilajt, ka ngjallur panik tek qytetarët. Në njoftimin, thuhet më tej se lufta e UÇK-së ka qenë e drejtë, e pastër dhe çlirimtare.
Njoftimi i Komunës së Malishevës:
Komuna e Malishevës, me shqetësim të madh ka marrë informacionin se EULEX-i mbrëmë ka arrestuar ish kryetarin e Komunës së Malishevës, z.Isni Kilaj. Paraprakisht, policia e EULEX-it ka bastisur shtëpinë e z.Kilaj, e rrjedhimisht ka shkaktuar edhe panikë dhe shqetësim të të gjithë qytetarëve.
Ne si komunë, besojmë dhe jemi thellë të bindur se lufta e Ushtrisë Çlirimtare të Kosovës, ka qenë luftë e pastër dhe mbi të gjitha ka qenë luftë çlirimtare, madje lufta e popullit të Kosovës, është lufta më e pastër që ka ndodhur ndonjëherë në histori të njerëzimit.
Ne kërkojmë që Gjykata Speciale, të ndërpresë këtë mënyrë të përndjekjes së çlirimtarëve dhe në të njëjtën kohë, kërkojmë që kjo Gjykatë dhe gjykatat tjera kompetente, përfshi edhe Tribunalin e Hagës, që të merret me ndjekjen, arrestimin dhe dënimin e autorëve të vrasjes së afër 400 civilëve të Komunës së Malishevës gjatë viteve 1998-1999 nga ushtria dhe policia e shtetit të Serbisë.
Kujtojmë se në territorin e Komunës së Malishevës, janë vrarë afër 400 civil të pafajshëm, madje janë vrarë në mënyrën më mizore të mundshme dhe deri më sot, nuk është dënuar askush dhe nuk është zhvilluar asnjë proces gjyqësor për këto vrasje, as për dy masakrat e mëdha, atë të Burimit dhe të Gollubovcit.
Edhe njëherë, shprehim shqetësimin tonë për këto veprime të pandërprera të Gjykatës Speciale dhe policisë së EULEX-it, për përndjekjen e luftëtarëve të lirisë dhe kërkojmë ndërprerjen e menjëhershme të këtyre arrestimeve të pakuptimta.
Isni Kilaj, dhe të gjithë bartësit e luftës çlirimtare, janë të pafajshëm dhe të gjitha këto veprime të gjykatave, i konsiderojmë si veprime politike, që për qëllim kanë njollosjen e luftës për çlirim.
Ne kërkojmë lirimin e menjëhershëm të Kilaj dhe të krerëve të luftës së UÇK-së dhe kërkojmë të ndërpriten këto veprime të turpshme.
Ne besojmë në drejtësi, por drejtësi duhet të ketë për të gjithë. Lufta e UÇK-së, është një luftë e njohur nga të gjithë, luftë e cila i ka sjellë lirinë dhe pavarësinë e Kosovës.
Kryetari i Komunës së Malishevës
Ekrem Kastrati
Disa ditë më parë, Gjykata Speciale ka kryer kontrolle në shtëpitë e ish-këshilltarëve të ish-presidentit Hashim Thaçi. Po sot, Specialja ka anuluar një intervistim për Rrustem Mustafën, ish-komandant i UÇK-së për zonën e Llapit.
Prokuroria Speciale me anë të një reagimi, shprehet se kontrollet e shtëpive dhe aksionet e tjera në Kosovë, kanë lidhje me “administrimin e drejtësisë”.
“Zyra e Prokurorit të Specializuar (ZPS) po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë.
Operacionet e ZPS-së këtë javë janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Policia e Kosovës dhe Misioni i Bashkimit Evropian për Sundimin e Ligjit në Kosovë (EULEX)”, njofton Prokuroria Speciale. /Zëri.ai/
