BEJRUT- Sulmi ndaj militantëve të Hezbollahut në Liban dhe Siri me shpërthimin e njëkohshëm të mijëra pagerëve ose siç njihen ndryshe, sinjalizues po ngjall disa pikëpyetje dhe dyshime. A është vërtet Izraeli pas gjithçkaje? Hezbollahu akuzoi shtetin hebre për shpërthimet që shkaktuan të paktën 18 të vdekur dhe 4,000 të plagosur. Tel Avivi nuk e ka marrë ende përgjegjësinë për sulmin, por tensioni mbetet i lartë dhe frika e një lufte të re në Lindjen e Mesme është aty. Autoritetet janë duke kryer hetimet e nevojshme për të zbuluar origjinën e sinjalizuesve që shpërthyen njëkohësisht. Ndonëse nuk ka një vendim zyrtar shumë teori po qarkullojnë në mediat ndërkombëtare.
Sipas Gold Apollo, e cila është një nga furnizuesit më të mëdhenj të pagers në botë, ato janë krijuar në Budapest, Hungari. Sipas tyre, kompania quhet Bac Consulting KFT dhe sipas një marrëveshje të lidhur mes dy firmave, ato lejohen të shesin sinjalizues në disa rajonë të caktuara. Por Gold Apollo hodhi poshtë të gjithë pretendimet se janë prodhuar prej saj dhe tha se kjo është përgjegjësi e Bac.
Presidenti dhe themeluesi i kompanisë tajvaneze Hsu Ching-kuang tha në një konferencë për media se kompania e tij ka pasur një marrëveshje licencimi të markës tregtare me kompaninë hungareze për tre vjet. "Kjo kompani ka bashkëpunuar me ne dhe përfaqëson shumë nga produktet tona. Ata gjithashtu donin të bënin pager dhe pyetën nëse mund të përdornin markën e kompanisë sonë", tha Hsu.
Sipas Reuters, sulmi është orkestruar nga Mossad. Reuters bazohet nga gazeta izraelite Haaretz, e cila tha se inteligjenca e Izraelit, Mossad, instaloi eksplozivë në pagerët e shpërthyer përpara se ato t'i dorëzoheshin organizatës Hezbollah. Po ashtu edhe Sky News Arabia shkroi se inteligjenca izraelite vendosi një sasi Petn (një material shumë shpërthyes) midis baterive të pajisjeve radio dhe i shpërtheu duke rritur temperaturën e baterive nga larg. Wall Street Journal raportoi se disa anëtarë të Hezbollahut ndjenë se pajierët e tyre po mbinxeheshin dhe i hodhën ata më parë se të ndodhte shpërthimi. Gjithashtu edhe, Al Jazeera tha se pesha e eksplozivit të vendosur në secilën pajisje ishte më pak se 20 gramë dhe se pagerët e hedhur në erë ishin importuar pesë muaj më parë.
-
-
Çfarë janë pagerët dhe pse i përdor Hezbollahu?
18 Shtator, 08:20 -
Çfarë ndodhi në të vërtetë me sinjalizuesit?
Sipas Paolo Dal Checco, konsulent mjeko-ligjor kompjuterik, tha për Corriere della Sera, se ekzistojnë dy skenarë, njëra është se ato ishin pajisur me pajisje vetëshkatërruese nëse grabiteshin dhe tjetra është se ata ishin pajisur me lëndë shpërthyese vetëm që kishin si objektiv disa persona të veçantë.
"Një hipotezë është se pagerët ishin të pajisur me një ngarkesë shpërthyese në mënyrë që ata mund të vetëshkatërroheshin në rast humbjeje ose vjedhjeje, duke dëmtuar gjithashtu potencialin për vjedhje. Përdoruesit ishin të vetëdijshëm për këtë. Një tjetër është se përdoruesit nuk ishin plotësisht të vetëdijshëm për të dhe se "kjo veçori ishte krijuar për të synuar përdorues të veçantë në një mënyrë të synuar". Eksperti kujton rastin e vitit 1996 në të cilin Shin Bet, një agjenci izraelite e inteligjencës, vrau "inxhinierin" Yahya Ayyash, përgjegjës për bombat vetëvrasëse, duke futur një mikrokarikim në telefonin e tij celular”, tha Dal Checco.
A mund të shpërthejnë telefonat celularë nga distanca? Dal Checco tha se kjo nuk është e mundur.
"Bateritë e litiumit të telefonave celularë, por edhe ato të pajisjeve shtëpiake, si dhe skuterët dhe makinat elektrike, janë vërtet objekt zjarresh, por nuk ka gjasa të shpërthejnë në një mënyrë komanduese”. Prandaj, mundësia që telefonat tanë celularë të mund të shpërthejnë nga distanca është e pamundur, nëse nuk është futur një ngarkesë shpërthyese", tha ai. /ZËRI
