BRITANI E MADHE- Shqiptari Ylber Dajci është vënë në pranga nga autoritetet në Mbretërinë e Bashkuar dhe është dënuar me 25 muaj burg. Dajci kishte kthyer ish-qendrën e punës në shtëpi kanabisi, me vlerë 1.9 milion paund.
Policia u informua për erën që vinte nga katet e sipërme të ndërtesës së ish-magazinës, nga stafi që kishte ngritur alarmin për këtë gjë. Njëkohësisht ata konstatuan rrjedhje uji nga kati i sipërm.
Prokurori Simon Goodman tha se oficerët shkuan për të hetuar më 18 gusht 2023. Ai shtoi se nuk u arrit asnjë hyrje me atë rast, por tre ditë më vonë kur stafi i Qendrës së Punës vuri re një burrë që hynte në ndërtesë nga porti i ngarkimit, policia u kontaktua përsëri.
“Këtë herë oficerët detyruan të hynin në ndërtesë dhe zbuluan në katet e sipërme se 16 dhoma ishin krijuar për të kultivuar 2373 bimë kanabisi, të cilat ishin në faza të ndryshme zhvillimi. Policia gjeti gjithashtu një shqiptar 42-vjeçar, Ylber Dajci, i fshehur në mesin e plantacionit, i cili vlerësohej se kishte mundur të prodhonte nga 66 deri në 199 kilogramë drogë të klasës B. Vlera e mundshme ishte 1.9 milionë paund nëse shitej në treg,”- tha Goodman.
Dajci, pa adresë fikse, pranoi në polici se ishte punësuar si kopshtar në prodhimin e kanabisit.
Eksperti i policisë arriti në përfundimin se Dajci ishte vetë në gjendje të keqe dhe pranoi se ai ishte kopshtar, pra thjesht përgjegjës për kujdesin e përditshëm të bimëve.
Eksperti supozoi se në këto rrethana Dajci kishte gjasa të ishte paguar shumë pak për shërbimet e tij. Gjykata u tha se matësi elektrik në katet e sipërme të ndërtesës ishte anashkaluar dhe se brenda ndërtesës ishin kryer edhe punime të gjera elektrike.
Avokatja e 42-vjeçarit, Catherine Spedding, tha se ai kishte ardhur ilegalisht në Britaninë e Madhe nga Shqipëria rreth 18 muaj para se të arrestohej.
“Si pjesë e kësaj ai kishte grumbulluar një borxh për trafikim. Ndërsa synonte plotësisht të punonte legalisht, mungesa dokumentet që kishte në dispozicion e penguan atë të punonte në mënyrë legjitime dhe ai ra përsëri në duart e trafikantëve në vend dhe u detyrua të bëhej kopshtar për të shlyer borxhin e tij. Dajci është familjar dhe i vjen keq për përfshirjen e tij në këtë sipërmarrje kriminale pasi besonte plotësisht se po vinte në këtë vend për të punuar legalisht, por realiteti ishte shumë ndryshe,”- tha ajo.
Gjyqtari, Recorder James Bromige tha se nuk kishte asnjë provë që Dajci kishte pasur probleme me policinë në këtë vend apo Shqipëri përpara kësaj vepre. Tashmë ai pritet të ekstradohet drejt Shqipërisë.
