EGJIPT- Piramidat e Egjiptit janë një nga mrekullitë e botës dhe kanë lënë pa fjalë arkeologët që nuk e kanë një shpjegim të qartë sesi janë ndërtuar 4000 vjet më parë. Sipas hulumtimit të shkencëtarëve të Universitetit të Karolinës së Veriut, të botuar në revistën Nature, piramidat janë ndërtuar me ndihmën e një dege të Nilit, e cila sot është e fshehur nën shkretëtirën dhe tokat bujqësore të rajonit.
Për shkencëtarët amerikanë, dega e Nilit "Ahramat" luajti një rol të rëndësishëm në ndërtimin e monumenteve si një rrugë ujore për të transportuar punëtorë dhe materiale ndërtimi në vendet ku u ndërtuan piramidat e Egjiptit.
BBC ka paraqitur gjetjet e hulumtimit amerikan dhe shpjegon se shkencëtarët zbuluan se piramidat ishin ndërtuar përgjatë një dege të lashtë të Nilit. Për shumë vite, arkeologët besonin se egjiptianët e lashtë kishin përdorur një rrugë ujore aty pranë për të transportuar materialet e ndërtimit. Megjithatë, deri më tani, askush nuk ishte i sigurt për vendndodhjen, formën, madhësinë apo afërsinë e kësaj rruge të madhe ujore me vendndodhjen aktuale të piramidave. Këtë fakt e nënvizon një nga autorët e hulumtimit, profesor Eman Ghoneim.
Më pas, shkencëtarët përdorën sondazhe gjeofizike dhe metoda të tjera për të konfirmuar praninë e lumenjve dhe kanaleve nën sipërfaqen e tokës. Analiza i befasoi pasi arritën të konfirmonin praninë e një dege të Nilit, 64 kilometra e gjatë, tashmë e mbuluar nga toka bujqësore. Në të njëjtën kohë, ky fakt gjeologjik mund të shpjegojë ngritjen e 31 piramidave, duke përfshirë kompleksin e Gizës.
Shumë nga piramidat kanë rrugëkalime që të çojnë atje ku dikur rridhnin ujërat e lumit dhe të çojnë në tempujt e luginës, të cilët mund të kenë funksionuar dikur si "porte" përgjatë Ahramatit./ZËRI
