ITALI- Davide Pecorelli, biznesmeni italian që inskenoi vdekjen e tij në Pukë, dhe u zhduk për shumë muaj, thotë se është i gatshëm që të vijë dhe të përballet me drejtësinë shqiptare. Deklarata e tij vjen 3 muaj pasi gjykata e Perugias në Itali miratoi ekstradimin e Pecorellit në Shqipëri.
Pecorelli, i cili inskenoi vdekjen e tij në zonën e Pukës për t’i shpëtuar borxheve ka deklaruar se “prej muajsh nuk kam fjetur pas dënimit për krime të padrejta dhe sepse këtu në Itali deri më tani jam trajtuar si një qytetar i dorës së dytë”.
Italiani u dënua nga gjykata e Shkodrës me 4 vite burg me akuzën e mashtrimit, zjarrvënies dhe shpifjes. Vetë ai ka deklaruar se ndaj tij janë ngritur akuza të padrejta, dhe se në Shqipëri ai ka dëmshpërblyer çdokënd që mund të jetë dëmtuar prej tij.
“Megjithatë, në shtator do të shkoj të përballem me sistemin e drejtësisë shqiptare, duke rrezikuar të arrestohem menjëherë. Ka një padrejtësi të vërtetë ndaj meje, krimi për të cilin Shqipëria kërkon dënimin tim bazohet në prova inekzistente kur unë i kam dëmshpërblyer të gjithë atje”, ka deklaruar Pecorelli, raportojnë mediat italiane.
“Është një avokat shqiptar që më ndjek, tre muaj nuk kam fjetur, duhet të paguaj për atë që kam bërë, por jo për gjëra të tjera që nuk ekzistojnë. Kështu që unë vihem në dispozicion të sistemit të drejtësisë shqiptare”, tha ai.
I pyetur për rrezikun e arrestimit, ai tha: “Po, jam në dijeni, por do të bëjmë gjithçka që të heqim akuzat”.
Davide Pecorelli u zhduk në janar të 2021 në qytetin e Pukës, ku një makinë që ishte marrë me qera prej tij, u gjet e djegur në një zonë të thellë, të pambuluar me kamera sigurie. Brenda makinës u gjetën dhe mbetje skeletore, që fillimisht u dyshua se i përkisnin biznesmenit.
Teksa autoritetet italiane dhe ato shqiptare u ngritën në këmbë për të mësuar se çfarë kishte ndodhur me biznesmenin, më 17 shtator 2021 Davide Pecorelli, u shfaq për mrekulli shëndoshë e mirë në një gomone pranë ishullit Montecristo. Më pas ai tronditi jo pak me historinë që tregoi, duke thënë se për 9 muaj, kur të gjithë e kishin shpallur të zhdukur, ai kishte qenë në kërkim të një thesari.
Me itinerarin nga Rinasi drejt Shkodrës e më pas në Pukë ai humbi gjurmët duke djegur brenda automjetit një skelet të cilin rezulton se e ka marrë duke dëmtuar një varr në varrezat e Pukës.
Për disa javë ky u bë lajmi që shqetësoi hetuesit mes Italisë e Shqipërisë ku një grup i posaçëm zbarkoi në Pukë. Por teksa hetimet ishin në vijim, rezultoi se eshtrat e gjetura në automjetin e djegur model Skoda i përkisnin një tjetër ADN-je dhe jo pemës gjenetike të familjes Pecorelli./ZËRI
