ANGLI - Suella Braverman, sekretarja e Brendshme e Britanisë, e cila ka zhvilluar së fundmi një diskurs populist, është dyshuar prej kohësh nga disa deputetë konservatorë se dëshironte të shkarkohej në mënyrë që të mund të ndjekë ambiciet e saj drejtuese.
Të enjten, kryeministri britanik Rishi Sunak ishte nën presionin e deputetëve konservatorë për të shkarkuar sekretaren e Brendshme, pasi Braverman bëri një shkrim të ashpër ndaj Policisë Metropolitane të Londrës.
"Unë besoj se ajo do që të shkarkohet", tha një ish-ministër. Braverman pretendoi se policia po lejonte atë që ajo e quajti një "marshim urrejtjeje" pro-palestinez të zhvillohej të shtunën. Një ministër i afërt me Sunak tha: "Ajo po rivalizon rrezikshëm kryeministrin".
Ndihmësit dhe ministrat e afërt me Sunak besojnë se ai do të shkarkojë Braverman pas një kohe të caktuar, ndoshta pasi Gjykata e Lartë të vendosë mbi ligjshmërinë ose jo të politikës së saj kryesore, për dërgimin e azilkërkuesve në Ruandë.
Për Braverman, një dalje nga qeveria mund të jetë e ngjashme me kërcimin nga një anije që po fundoset. Një sondazh i YouGov i publikuar të enjten i vendos konservatorët 24 pikë prapa partisë opozitare Laburiste.
Sekretarja e Brendshme ka lënë përshtypjen se e provon vazhdimisht fatin. Në konferencën e konservatorëve në tetor ajo iu referua migrimit masiv si një "uragan". Këtë muaj ajo pretendoi se ata që flinin jashtë nëpër tenda po bënin stilin e jetesës, ‘që ata e kanë zgjedhur’.
Me këto deklarata provokuese Braverman po i shton pikë vetes, pasi siç besojnë shumë deputetë konservatorë, Konservatorët mund të mposhten në zgjedhjet e përgjithshme, që priten vitin e ardhshëm.
Deputetja konservatore, Miriam Cates, tha në faqen e mediave sociale X: "Pikëpamjet e Suella Braverman mund të jenë të pakëndshme për liberalët e Uestminsterit, por ato janë krejtësisht të zakonshme në pjesën tjetër të Britanisë".
Braverman lindi nga prindër me origjinë indiane; nëna e saj ishte nga Mauritius dhe babai i saj nga Kenia, të cilët të dy u zhvendosën në Britani në vitet 1960.
Ajo jetoi në Francë për dy vjet, duke studiuar nën skemën Erasmus të BE-së, por më vonë vazhdoi të bëhej një mbështetëse e Brexit dhe dha dorëheqjen nga kabineti i Theresa May në 2018 për mosmarrëveshjet mbi procesin e Brexit.
Braverman u bë avokate në vitin 2005, ku ndër të tjera punoi në çështjet gjyqësore të qeverisë për imigracionin. Ajo u bë deputete konservatore për Fareham në vitin 2015.
Yvette Cooper, sekretarja e brendshme në hije e laburistëve, tha se homologia e saj “po ndizte qëllimisht tensionet në komunitete, në mënyrën më të rrezikshme. ‘Fjalët e saj janë të papërgjegjshme dhe të rrezikshme. Asnjë sekretar tjetër i Brendshëm nuk do të kishte bërë të tilla deklarata”, tha Cooper.
Braverman gjithashtu shkaktoi zemërim në shkrimin e saj, duke krahasuar protestat pro-palestineze me marshimet sektare në Irlandën e Veriut.
Colum Eastuood, një deputete dhe udhëheqëse e Partisë Social Demokrate dhe Laburiste të Irlandës së Veriut, tha: "Ajo ka arritur të ofendojë pothuajse të gjithë – dëmet janë të shumta, aq më tepër në një shoqëri që gjithmonë e më tepër është e ndarë".
Por Braverman ka qenë e dobishme për Sunak në të kaluarën, duke përdorur atë lloj gjuhe për migracionin dhe krimin, që pasqyrohet në shtypin e krahut të djathtë dhe disa votues janë siguruar dhe thjesht nga këto deklarata.
Sunak e bëri Bravermanin sekretaren e tij të Brendshme, në tetor 2022. Ajo kishte shkelur rregulla ministrore, duke i dërguar një dokument zyrtar një deputeteje tjetër e duke përdorur emailin e saj personal.
Marrëdhëniet midis Braverman dhe Sunak janë bërë gjithnjë e më të ndërlikuara, së fundmi. Braverman si sekretare e Brendshme mbahet mend për përpjekjet e saj për të ndaluar fluksin e migrantëve nëpër Kanalin Anglez me varka të vogla, duke përfshirë ndjekjen e "ëndrrës" së saj, për të dëbuar azilkërkuesit në Ruandë.
Një marrëveshje kthimi me Shqipërinë ka ndihmuar në uljen e numrit të kalimeve të emigrantëve me rreth një të pestën këtë vit dhe Braverman u ka thënë kolegëve se është e bindur se Gjykata e Lartë do të vendosë se politika e saj për të dërguar emigrantët në Ruanda është e ligjshme.
Shumë deputetë konservatorë besojnë se ajo do kishte vështirësi në drejtim, nëse ka ambicie për post më të lartë në të ardhmen. Fakti që retorika e saj nxitëse nuk ka bërë që të rritet në pozita, mund të pasqyrojë nervozizmin në rritje në partinë konservatore.
Nickie Aiken, zëvendëskryetarja konservatore, kritikoi Braverman për përfshirjen e saj në çështje që i takojnë policisë. “Është shumë e rëndësishme që policia të bëjë punët e policisë dhe politikanët të bëjnë politikë,” tha ajo.
Një ish-ministër tha: "Ajo është përçarëse dhe po dëmton rrugën e partisë për ligj dhe rend"./Zëri.ai/
