SHBA-Pasi u lehtësua me vendimin e gjykatës penale të Nju Jorkut që shpalli fajtor Donald Trumpin për 34 akuza, ish-ylli i filmave për të rritur, Stormy Daniels, tani i drejtohet gruas së tij, Melania. Daniels e këshillon Melanian ta lërë bashkëshortin e saj dhe të vazhdojë jetën.
Në një intervistë për gazetën britanike Mirror, Daniels këshilloi gruan e tretë të ish-presidentit amerikan që të divorcohej nga ai për dy arsye: për shkak se ai kishte lidhje jashtëmartesore dhe sepse ai është një kriminel i dënuar, shkruajnë mediat e huaja.
Gjatë gjyqit gjashtë-javor të Trump, ish-“zonja e parë” e SHBA-së nuk u shfaq kurrë në krah të tij. Ndryshe nga anëtarët e tjerë të familjes Trump që e mbështetën atë gjatë çështjes së profilit të lartë, Melania nuk u pa në sallën e gjyqit, duke ndezur një sërë thashethemesh për gjendjen e martesës së tyre 19-vjeçare.
Donald Trump u shpall fajtor nga Gjykata Federale e Manhatan për të gjitha akuzat në ngarkim të tij. Juria në Nju Jork e shpalli atë fajtor në lidhje me 34 akuza për falsifikimin e dokumenteve, një skemë kriminale të dhënies së ryshfetit për të ndikuar në rezultatin e zgjedhjeve të 2016-ës. Sipas urdhrit të gjykatës, Trump u përpoq të blinte heshtjen e Daniels në mënyrë që ajo të mos fliste publikisht për marrëdhënien që kishte pasur me të më herët, para zgjedhjeve të vitit 2016. /ZËRI
