BRUKSEL- Parlamenti Evropian ka miratuar të enjten një rezolutë për procesin e zgjerimit të Bashkimit Evropian (BE), përmes së cilës kërkoi që ky proces të bëhet më efikas, përfshirë duke e hequr përdorimin e vetos për vendet anëtare.
Rezoluta kërkon gjithashtu që BE të ketë një buxhet më efikas në mënyrë që të jetë në gjendje të përballojë zgjerimin me vendet e reja anëtare.
Rezoluta u mbështet nga 305 deputetë, ndërsa 157 deputetë votuan kundër dhe 71 abstenuan. Bashkimi Evropian, aktualisht, për çdo vendim në fushën e politikës së jashtme dhe sigurisë, përfshirë procesin e zgjerimit, duhet të gjejë konsensus. Kjo ka çuar shpesh në bllokimin e vendimeve nga një shtet anëtar përmes një vetoje, edhe kur të gjithë të tjerët ishin në favor.
Parlamenti Evropian gjithashtu mbështet integrimin gradual të vendeve kandidate në tregun e vetëm të BE-së gjatë gjithë procesit të zgjerimit, edhe para se ato të bëhen anëtarë formalë të bllokut./ZËRI
