RUSI- Presidenti rus Vladimir Putin po mban fjalimin e tij vjetor për Gjendjen e Kombit, dy javë përpara zgjedhjeve që ai është i sigurt se do t'i fitojë. Ai ka paralajmëruar shtetet e NATO-s se rrezikojnë të përfshihen në një konflikt bërthamor, nëse aleanca dërgon trupa në Ukrainë.
Gjatë adresimit vjetor, Putin shtoi se Rusia duhet të forcojë krahun perëndimor të ushtrisë së saj, pasi Finlanda dhe Suedia janë anëtaret më të reja të NATO-s.
“Ata po përgatiten të godasin territorin tonë dhe përdorin forcat më të mira të mundshme, forcat më efektive për ta bërë këtë. Por ne kujtojmë fatin e atyre që u përpoqën të pushtojnë territorin tonë dhe sigurisht fati i tyre do të jetë shumë më tragjik se çdo gjë me të cilën mund të përballemi. Ata duhet të kuptojnë se edhe ne kemi armë. Armët që mund t’i mposhtin ata në territorin e tyre dhe sigurisht e gjithë kjo është shumë e rrezikshme sepse në të vërtetë mund të shkaktojë përdorimin e armëve bërthamore. A nuk e kuptojnë këtë? Këta njerëz janë njerëz që nuk kanë kaluar përvoja të vështira. Ata e kanë harruar këtë, por ne e bëmë luftën Kaukaziane, për shembull, dhe tani në konfliktin në Ukrainë”, u shpreh Putin.
Ai gjithashtu ka folur për nevojën për të krijuar pika të reja kontakti me vendet dhe kombet arabe në Amerikën Latine dhe Afrikë.
Që nga pushtimi në shkallë të plotë të Ukrainës, Rusia është goditur me valë sanksionesh nga Evropa, Britania e Madhe dhe SHBA, duke përfshirë parandalimin e bankave ruse për të hyrë në sistemet normale të tregtimit dhe përfundimin e blerjes së naftës dhe gazit rus.
Sakaq, theksojmë se këto paralajmërime të njëpasnjëshme të liderit rus vijnë një ditë pasi, Presidenti i Ukrainës Volodymyr Zelenskyy është përpjekur të mbledhë mbështetjen e Ballkanit dhe ka promovuar idenë e prodhimit të përbashkët të armëve në samitin dy-ditor të vendeve të Evropës Juglindore, shkruajnë mediat e huaja./ ZËRI
