KOSOVË- Kryeministri në detyrë i Kosovës dhe njëherazi kryetar i Lëvizjes Vetëvendosje, Albin Kurti, është takuar sërish këtë të mërkurë me kreun e Lidhjes Demokratike të Kosovës, Lumir Abdixhiku, në kuadër të diskutimeve për zgjedhjen e Presidentit të vendit. Takimi mes dy liderëve ka nisur rreth orës 16:00 dhe vjen në një moment kur vijojnë përpjekjet për sigurimin e mbështetjes politike për kandidaturën e propozuar.
Një ditë më parë, kreu i LDK-së bëri të ditur se gjashtë deputetë të kësaj force politike nuk do të mbështesin kandidaturën e Bekim Sejdiut për President. Mes deputetëve që kanë shprehur publikisht qëndrimin e tyre janë Hykmete Bajrami, Avdullah Hoti, Kujtim Shala, Arben Gashi, Armend Zemaj dhe Janina Ymeri.
Ndërkohë, edhe Grupi Parlamentar i Vetëvendosjes zhvilloi një mbledhje lidhur me këtë çështje. Pas saj, Kurti deklaroi se deputetët e kësaj force janë të unifikuar në mbështetje të kandidaturës së Sejdiut, por theksoi se, pas qëndrimit të gjashtë deputetëve të LDK-së, numri maksimal i votave që mund të sigurohen mbetet 74./ZËRI
