KIEV- Presidenti ukrainas Volodymyr Zelenskyy tha se Vladimir Putin do të përpiqet të mashtrojë Donald Trump gjatë takimit të tyre në Alaska, i planifikuar për këtë të premte. Deklaratën, presidenti ukrainas e ka bërë për median e huaj "Politico".
"Ne e kuptojmë qëllimin e rusëve për të mashtruar Amerikën, por nuk do ta lejojmë. E vlerësoj shumë vendosmërinë e Presidentit Trump për të ndaluar vdekjet e luftës. Shumë njerëz japin jetën e tyre çdo ditë. Por shkaku i vetëm i këtyre vrasjeve është dëshira e Putinit për të luftuar dhe manipuluar këdo me të cilin bie në kontakt. Ne në Ukrainë e njohim mirë Rusinë dhe kjo është arsyeja pse ukrainasit kanë duruar tashmë më shumë se tre vjet luftë,"- tha Zelenskyy.
Zelenskyy tha gjithashtu se çdo lëshim ndaj Rusisë nuk do t'i jepte fund luftës. Në një postim në Telegram, presidenti ukrainastheksoi se "lëshimet nuk do ta dekurajojnë vrasësin", duke vënë në dukje se 137 përleshje në vijën e frontit u regjistruan vetëm në 24 orët e fundit. Sipas tij, Rusia nuk e zvogëlon presionin dhe nuk i llogarit humbjet e saj.
"Rusia po e zgjat luftën dhe për këtë arsye meriton një presion më të fortë nga bota. Rusia refuzon të ndalojë vrasjet dhe për këtë arsye nuk duhet të marrë asnjë shpërblim apo rezultat pozitiv për veten e saj. Dhe ky nuk është vetëm një qëndrim moral - është një qëndrim racional."
Shkëmbim territorial?
Samiti i shumëpritur në Alaska vjen ndërsa Trump përpiqet të ushtrojë presion mbi Putinin që t'i japë fund luftës totale kundër Ukrainës. Pas bisedimeve të javës së kaluar midis Putinit dhe të dërguarit të Trump, Steve Witkoff, në Moskë, thuhet se është duke u shqyrtuar mundësia e një shkëmbimi territorial. Sipas propozimit, Rusia do të mbante rajonet që i ka pushtuar tashmë, si dhe një pjesë të territorit që nuk e ka pushtuar ende plotësisht. Zelenskyy e hodhi poshtë me forcë një ide të tillë dhe në vend të kësaj bën thirrje për vendosjen e sanksioneve të forta të SHBA-së ndaj Rusisë. Aleatët evropianë të Kievit këmbëngulin gjithashtu që qëndrimi i Ukrainës të merret parasysh gjatë negociatave./ZËRI
