GJENEVË- Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus tha se "bota nuk është gati" për një pandemi të re. Kjo e fundit është vetëm çështje kohe që të na "godasë", por ka edhe një emër: Sëmundja X.
"Cikli i panikut dhe neglizhencës fillon të përsëritet. Mësimet e dhimbshme që morëm gjatë pandemisë Covid-19 rrezikojnë të harrohen, sepse vëmendja është e përqendruar në shumë kriza të tjera me të cilat po përballet bota jonë aktualisht," - tha Tedros Adhanom Ghebreyesus.
Pandemia e ardhshme mund të shkaktohet nga një virus gripi ose një virus i ri korona ose një patogjen i ri që ende nuk e dimë se çfarë mund të jetë, të cilin do ta quajmë "sëmundja X".
"Pikërisht gjashtë vjet më parë, thashë se bota nuk ishte gati për një pandemi dhe më pas shpreha shqetësimin se një pandemi mund të ndodhte në çdo kohë. Më pak se dy vjet më vonë, erdhi pandemia e Covid 19 dhe bota nuk ishte gati. Pas Covid-it, 19 milionë njerëz kanë vdekur nga tronditjet sociale, ekonomike dhe politike që jehojnë edhe sot e kësaj dite," – tha Ghebreyesus.
Ai shpjegoi se “sëmundja X” nuk është diçka e re dhe se është një term që përdoret që nga viti 2018 dhe se nënkupton një sëmundje me origjinë të panjohur, ndikimi i së cilës mund të përgatitet paraprakisht. Ai vuri në dukje se Covid-19 ishte në të vërtetë "sëmundja X", domethënë një patogjen i ri që shkaktoi një sëmundje të re./ZËRI
