SERBI- Presidenti i Serbisë, Aleksandër Vuçiç, ka reaguar ashpër duke kritikuar Brukselin për qëndrimin ndaj debatit që është ndezur për Lumin Ibër.
Vuçiç deklaroi se Komisioni Evropian reagoi shpejt ndaj deklaratës së tij për një ndryshim të mundshëm të rrjedhës së lumit Ibër me qëllim mbrojtjen e shërbëtorëve të tij shqiptarë, ndërsa sipas tij nuk ka pasur reagime ndaj arrestimeve dhe keqtrajtimit të përditshëm të serbëve në Kosovë e Metohi.
Duke komentuar deklaratën e zëdhënësit të Komisionit se vërejtjet për ndryshimin e rrjedhës së lumit nuk kontribuojnë në normalizimin e marrëdhënieve Beograd-Prishtinë dhe se kjo mund të arrihet vetëm përmes dialogut, Vuçiç theksoi se marrëveshja e nënshkruar për themelimin e Bashkësisë së Komunave Serbe ende nuk është zbatuar dhe se BE-ja nuk ka reaguar ndaj keqtrajtimit dhe persekutimit të përditshëm të serbëve dhe prishjes së shtëpive serbe.
“A e keni fjalën për dialogun që nënshkruat edhe për formimin e Bashkësisë së Komunave Serbe, a e keni fjalën për atë dialog? Apo e keni fjalën për mungesën e dialogut dhe reagimet tuaja ndaj arrestimeve të përditshme të serbëve, keqtrajtimit të përditshëm të serbëve, persekutimit të përditshëm të serbëve, prishjes së shtëpive serbe, a e keni fjalën për këtë? Dhe pastaj ju kujtuat nëse dikush do t’i ndryshonte apo jo rrjedhën e ujit”, tha Vuçiç.
Ai u tha shtypit në Arilje se një ndryshim i mundshëm në rrjedhën e Ibrit, për shkak të nevojës për ujë në Serbinë qendrore, është ende shumë larg.
“Ne tashmë kemi disa ekspertë, na duhen edhe të tjerë, kështu që le të shohim se çfarë do të bëjmë dhe si do ta bëjmë. Por ata reaguan menjëherë ndaj kësaj, për të mbrojtur ‘shërbëtorët e tyre shqiptarë’ dhe për t’u thënë edhe një herë: vazhdoni të kryeni krime”, theksoi Vuçiç.
Vuçiç tha gjithashtu se Shefi i Shtabit të Përgjithshëm të Forcave të Armatosura të Serbisë, Milan Mojsiloviç, kishte folur me Komandantin e KFOR-it, Özkan Ulutaş, duke e vlerësuar bisedën si më të keqen deri më tani.
Vuçiç tha dje se Mojsiloviç kishte folur me Ulutaş sepse misioni donte të rihapte për trafik urën kryesore mbi lumin Ibër në Mitrovicë.
KFOR-i konfirmoi dje se kishte filluar të zvogëlonte praninë e tij të përhershme në urën kryesore mbi Ibër, e cila lidh Mitrovicën Jugore dhe Veriore, dhe njoftoi se kishte filluar integrimin e personelit të të ashtuquajturës Polici e Kosovës në strukturën e sigurisë së KFOR-it në manastirin serb të Deçanit./ZËRI
