SHBA- Presidenti i SHBA-së, Donald Trump, ka përjashtuar mundësinë e kandidimit për një mandat të tretë në detyrë, duke pretenduar se ligji është “shumë i fortë” me një kufizim prej dy mandatesh.
"Do të kandidoja me kënaqësi, por ligji është shumë i rreptë. Të gjithë më kërkojnë ta bëj, të gjithë duan që ta bëj, por ligji është shumë i rreptë.", tha Trump.
Sipas Amendamentit të 22-të të Kushtetutës së SHBA-së, asnjë person nuk mund të zgjidhet president më shumë se dy herë. Ai u ratifikua në vitin 1951, pjesërisht në përgjigje të zgjedhjes së Franklin D. Roosevelt për katër mandate. Trump është zgjedhur president dy herë, në vitin 2016 dhe 2024. Trump shërbeu tashmë si president nga viti 2017 deri në vitin 2021, dhe në vitin 2025 ai mori detyrën për herë të dytë pasi fitoi zgjedhjet e vitit 2024.
Ndryshimi i këtij kufizimi do të kërkonte një amendament kushtetues. Një amendament duhet të propozohet nga dy të tretat e të dy dhomave të Kongresit ose nga një konventë e thirrur nga dy të tretat e legjislaturave shtetërore, dhe më pas të ratifikohet nga tre të katërtat e shteteve./ZËRI
