SHBA- Ndryshimet gjithëpërfshirëse që Mark Zuckerberg po i bën kompanisë "Meta" dhe rrjeteve sociale Facebook dhe Instagram po provokojnë reagime nga anëtarët e komunitetit LGBTQ dhe nga liberalët. "New York Times" raporton përpjekjen e tyre për të ndaluar ndryshimet, të cilat vijnë jo vetëm pas fitores zgjedhore të Donald Trump, por edhe pas vizitës së Zuckerberg në Mar a Lago dhe takimit të tij me presidentin e zgjedhur, nëntorin e kaluar.
Në fokus të ndryshimeve janë rregulloret që kanë të bëjnë me diskursin publik, lajmet e rreme dhe të ashtuquajturën "woke culture". Tani në rrjetet sociale që ka kompania Meta do të lejohet më shumë përmbajtje politike.
Procesi sekret, pak nga 70,000 punonjësit e dinin
Sipas "New York Times", ndryshimet duket se janë të lidhura drejtpërdrejt me epërsinë politike të Donald Trump, duke sinjalizuar një ndryshim në strategjinë e Metës, si dhe një pozicionim të qartë personal të Zuckerberg për lirinë e fjalës. Por ndryshimet e politikave të Metës u bënë në një mënyrë shumë të pazakontë dhe disi sekrete. Zuckerberg mblodhi një grup të vogël personeli të ngushtë, duke përfshirë drejtues të rangut të lartë të politikës dhe komunikimit, për të përcaktuar drejtimet e reja. Procesi zgjati vetëm 6 javë, duke anashkaluar konsultimet e zakonshme me punonjësit, partnerët socialë dhe konsulentët e jashtëm, të cilat zakonisht zgjasin me muaj. Rezultati u shpall më 2 janar, duke habitur shumicën e 72 mijë punonjësve të Metës.
Zuckerberg kishte vendosur të bënte ndryshime gjithëpërfshirëse pasi vizitoi Presidentin e zgjedhur Donald Trump në Mar a Lago në Ditën e Falenderimeve. Deri në fund të dhjetorit, Zuckerberg ishte gati t'i bënte publike ndryshimet.
Ndryshimet në diskursin publik dhe kontrollin e fakteve
Meta ka vendosur të ndryshojë lirimin e kufizimeve në lidhje me diskursin politik dhe çështjet sociale që lidhen me emigracionin, racën, ngjyrën dhe gjininë. Ndër ndryshimet që kanë shqetësuar më shumë kritikët e Zuckerberg është heqja e kufizimeve për deklaratat kundër grupeve të caktuara racore ose seksuale. Meta tani lejon pretendimet se grupe të veçanta që identifikohen si të ndryshëm nga të tjerët kanë çrregullime mendore, një vendim që kompania e lidhi me debatin publik rreth të drejtave transgjinore.
Ndryshimet në politikat e diversitetit dhe përfshirjes
Transformimi i Metës vazhdoi kur kompania u njoftoi punonjësve se do t'i jepte fund politikës së diversitetit, barazisë dhe përfshirjes. Zuckerberg hoqi detyrimet për të punësuar një numër të caktuar grash dhe pakicash dhe shtoi se nuk do t'i jepte më përparësi bizneseve në pronësi të pakicave të caktuara, nëse nuk do të kenë performancë.
Tamponët dhe banjot e meshkujve
Kompania hoqi gjithashtu "temat" transgjinore dhe jobinare në aplikacionin e saj "Messenger", i cili lejon përdoruesit të personalizojnë ngjyrat dhe sfondin e aplikacionit. Në të njëjtën ditë menaxherët në zyrat e Metës në Silicon Valley, Teksas dhe Nju Jork, u urdhëruan të hiqnin tamponët dhe pecetat higjienike nga tualetet e burrave që kompania kishte vendosur për punonjësit jobinarë dhe transgjinorë.
'Më vjen turp të punoj për Metën' - Reagimet e punonjësve
Në ditët në vijim, ndryshimet morën lavde nga rrethi i Trump dhe konservatorët, por kritika nga presidenti Joe Biden dhe shkaktuan shqetësime tek grupet e avokimit të komunitetit LGBTQ. Këta të fundit shprehen se kanë frikë se ndryshimet do të sjellin ngacmimin dhe bullizimin e shumë njerëzve. Në Shtëpinë e Bardhë, të premten, presidenti Biden u tha gazetarëve se veprimet e Zuckerberg ishin "të turpshme".
Por brenda kompanisë reagimet ishin të ndara! Disa punonjës i përshëndetën lëvizjet, ndërsa të tjerë u tronditën dhe shprehën kundër ndryshimeve. Disa punonjës u shprehën për "NYT" se kishin turp të punonin për Metën.
Në "workplace", softuerin e komunikimit të brendshëm të Metës, punonjësit filluan të debatojnë për ndryshimet. Në grupin e punonjësve @Pride, ku mblidhen punëtorët që mbështesin çështjet LGBTQ, një person njoftoi dorëheqjen e tij, ndërsa të tjerët njoftuan se kishin nisur të kërkonin punë diku tjetër.
Të premten, Roy Austin, nënkryetari i Metës për të drejtat civile, njoftoi se po largohej nga kompania. Por nuk e zbuloi arsyen.
Ndryshe nga Austin, skuadra e marketingut të Metës, mbrojti Zuckerberg dhe tha se çështja e transgjinorëve ishte e politizuar. Po ashtu, shtuan se politikat e Metës nuk duhet të pengonin mundësinë e debatit në rrjetet sociale, dke marrë shembullin e ligjit "Roe v. Wade" për abortin.
Zuckerberg për Joe Rogan: Administrata e Biden po na fyente, na bënte thirrje për censurë
Në një intervistë me podkasterin Joe Rogan të premten, Zuckerberg tha se ishte koha që Meta t'i "rikthehej" misionit origjinal për t'u dhënë njerëzve "fuqinë për të ndarë" mendimet e tyre. Ai tha se kishte ndjerë presion nga administrata Biden dhe media për të "censuruar" disa përmbajtje të ndryshme. Gjithashtu, ai mohoi në intervistë se po bënte ndryshime për të qetësuar administratën e ardhshme të Trump, por shtoi se zgjedhjet ndikuan në mënyrën sesi ai mendonte./ZËRI
