Itali- Një 36-vjeçar shqiptar është arrestuar në Fermo, Itali, pasi është dënuar për vrasjen e një rumuni për prishjen e pazareve të drogës. Autoritetet italiane njoftuan se shqiptari u ndalua gjatë një operacioni të zhvilluar në zonën e Fermos. Ngjarja e rëndë ka ndodhur në vitin 2020. 36-vjeçari ka qenë i dënuar më parë me 2 vite burg për trafik droge, ndërsa për krimin e rëndë gjykata e ka dënuar atë me 22 vite burg.
Krimi dyshohet se ka zanafillën për prishjen e pazareve të drogës dhe kontrollin e biznesit ilegal mes Fermos dhe Porto Sant'Elpidio. Më 17 shkurt 2020, u gjet trupi i pajetë i 36-vjeçarit rumun, i cili ishte vrarë me thikë. Viktima, gjithashtu një person me precedentë penalë, kishte plagë të shumta me thikë në shpinë.
Autoritetet këqyren kamerat e sigurisë dhe kontrolluan telefonin e viktimës për të hetuar lidhjet me autorin e dyshuar. 36-vjeçari ndodhej në Shqipëri, por për arsye shëndetësore dhe familjare u rikthye në Itali, ku u bë i mundur arrestimi i tij./ZËRI
