TIRANË- Biznesmeni Koço Kokëdhima është rikthyer sërish në vëmendjen e mediave, kësaj here për shkak të një incidenti të ndodhur gjatë ndeshjes mes Apolonisë dhe Gramshit. Ish-deputeti i Partisë Socialiste, i cili aktualisht është presidenti i klubit "Apolonia" është futur në fushë gjatë ndeshjes dhe ka tentuar që të godasë arbitrin kryesor të ndeshjes Dorian Maletaj. Kjo për shkak se dha 3 kartona të kuq për lojtaret e ekipit të Apolonisë, të cilat pavarësisht mungesave, arritën që të triumfonin me rezultatin 1-0.
Incidenti është denoncuar nga drejtoresha e klubit të Gramshit, Edonisa Aliu, e cila nëpërmjet rrjeteve sociale, ka shpërndarë të gjitha momentet e tensionit ku shihet edhe Kokëdhima në fushën e blertë.
MOMENTI ME VIDEO:
“Që të gjithë na kanë frikë, kjo nuk diskutohet. Por që të futet presidenti i Apolonisë bashkë me zyrtarët e klubit në fushë për të dhunuar arbitrin e ndeshjes, këtë nuk e kisha menduar. Ja ku e keni presidentin Kokëdhima bashkë me zyrtarët e tij që godasin e shtyjnë, ofendojnë me fjalorin e rrugës arbitrat e ndeshjes. Turp! Turp! Turp!”, shkruan drejtuesja e Gramshit.
Ndërkohë që për momentin nuk ka asnjë reagim nga klubi i Apolonisë, por as nga Federata Shqiptare e Futbollit./ZËRI
