ELBASAN- Ka nisur rindërtimi i skenës së krimit për vrasjen e Pjerin Xhuvanit. Gjykata u kërkoi ekspertëve rindërtimin e vendit të ngjarjes, ndërsa këta të fundit kërkuan angazhimin maksimal te policisë se Elbasanit për të bërë të mundur rindërtimin e skenës së krimit. Gjykata ka caktuar tre ekspertë, njëri prej tyre ekspert balistik dhe i vendngjarjeve në Policinë e Shtetit. Policia e Elbasanit ka vendosur shiritin rrethues në zonë për t'u lënë hapësirë ekspertëve. Eksperimenti hetimor vjen pas kërkesës të të akuzuarit për vrasjen e Xhuvanit, Arbër Paplekajt.
Gjykata e Apelit të Juridiksionit të Përgjithshëm vendosi në 4 mars 2024 të marrë parasysh disa nga kërkesat e Arbër Paplekaj, ish-efektivi i Gardës i cili është shpallur fajtor dhe është dënuar me 22 vite burg për vrasjen e Pjerin Xhuvanit. Apeli ka vendosur të marrë informacion në lidhje me dy personat, të cilët akuzohen për “Dëshmi të rreme”, kryer në gjykimin e zhvilluar në Gjykatën e Shkallës së Parë e Juridiksionit të Përgjithshëm Elbasan si dhe të merret informacion mbi vijimin e procedimit penal të pezulluar për personat, që kanë qëlluar me armë zjarri në vendngjarje. Kjo do të jetë hera e dytë që rindërtohet ngjarja. Me herët, prokuroria e Elbasanit rindërtoi ngjarjen në korrik të vitit 2022.
Si ndodhi vrasja?
Më 21 prill 2021, 4 ditë para zgjedhjeve parlamentare të 25 prillit, në Elbasan u vra Pjerin Xhuvani, përkrahës i Partisë Socialiste. Paplekaj ishte pjesë e një "SMV", strukture për Mbrojtjen e Votës e ngritur në Elbasan nga PD. Pas një sherri verbal pasi SMV dyshonte se Xhuvani ishte pjesë e një grupi që blinin vota, ndodhi vrasja ku mbeti i pajetë Xhuvani dhe u plagosën 4 persona të tjerë. Të plagosurit ishin Paulo Vuksani, Emiljano Prenga, Eltjon Bodinaku dhe Xhensila Sota. Nga dita e arrestimit deri më sot në pranga është ish-oficeri i RENEA-s, Arbër Paplekaj i cili akuzohet se qëlloi për vdekje Xhuvanin dhe dhëndrin e tij, Eltjon Bodinakun. Paplekaj, një ish efektiv i RENEA u vetëdorëzua dhe pranoi krimin duke thënë se e kishte bërë goditjen pasi ishte qëlluar më parë me armë zjarri./ZËRI
