TIRANË- Nëna e palestinezes, Rayyan Alwan, e cila u vra nga babai i saj në Tiranë, pritet që të vijë në Shqipëri. Mësohet se ajo ka kontaktuar me Policinë dhe ka konfirmuar se do të udhëtojë në vendin tonë, për të dhënë dëshminë në lidhje me vrasjen e vajzës së saj 24-vjeçare. Por, deri më tani, ajo apo të afërm të tjerë të viktimës nuk kanë bërë kërkesë për tërheqjen e trupit të pajetë të Alwan, i cili vijon të mbahet në morgun e Tiranës.
Me dëshminë e saj, nëna e 24-vjeçares pritet që të hedhë dritë mbi motivet e krimit të rëndë, se përse Fadi Alwan udhëtoi drejt vendit tonë dhe më pas vrau vajzën e tij. E reja u gjet e pajetë,më 27 shkurt në një banesë të marrë me qera në rrugën Gjon Muzaka në Tiranë.
Rayyan Alwan dhe Fadi Alwan mbërritën si turistë në Rinas më 19 shkurt. Po atë ditë dyshja kishin marrë banesën me qira ku edhe ndodhi krimi. Nga të dhënat e deritanishme hetimore, dyshohet se autori i ngjarjes, Fadi Alwan është larguar menjëherë jashtë territorit të Shqipërisë, pas kryerjes së krimit. 49-vjeçari palestinez, dyshohet se fillimisht e ka dhunuar dhe më pas e ka vrarë me thikë, duke e mbuluar me një çarçaf. Dyshohet se ai ka marrë të gjithë mjetet e identifikimit, telefonin dhe çdo send personal të 24-vjeçares dhe është larguar në drejtim të Greqisë e më pas në Holandë, ndërsa dyshohet se fshihet në Liban. Autoritetet shqiptare kanë kërkuar ndihmën e policive europiane për gjetjen dhe arrestimin e autorit të dyshuar./ZËRI
