SARANDË- Hekuran Murtaj, 33 vjeç është vënë në prangat e Policisë së Sarandës këtë të enjte pasi akuzohet për dëshmi të rreme dhe armëmbajtje pa leje. Sipas bluve të qytetit bregdetar, i riu më 20 shtator të këtij vitit është vetëplagosur me armë zjarri (që e kishte pa leje) teksa punonte tokën por para hetuesve kishte thënë tjetër gjë.
Ditën e ngjarjes ku përfundoi i gjakosur në spital ai kishte deklaruar se është vetëplagosur nga plasja e një fisheku luftarak teksa ishte duke punuar tokën. Por ngjarjen kanë pasur dijeni dhe dy persona, Mullez Murtaj dhe Luan Rama, të cilët po ashtu janë arrestuar nga Policia.
NJOFTIMI I POLICISË:
Sarandë/Zbardhet dhe dokumentohet ngjarja e ndodhur më datë 20.09.2023, për të cilën një 33-vjeçar deklaroi se ishte dëmtuar aksidentalisht, nga plasja e një fisheku luftarak. Vihet në pranga 33-vjeçari, pasi nga hetimet rezultoi se ishte vetëplagosur aksidentalisht, me një armë zjarri të cilën e posedonte pa leje. Në pranga dhe 2 shtetas të tjerë të cilët dyshohet se fshehën armën e zjarrit dhe bënë kallëzime të rreme, për të penguar zbulimin e së vërtetës.
Si rezultat i hetimeve të thelluara, të kryera menjëherë pas ngjarjes së ndodhur më datë 20.09.2023, në fshatin Stjar, Delvinë, ku shtetasi H. M. deklaroi se ishte dëmtuar aksidentalisht, gjatë kohës që punonte në tokën e tij, nga plasja e një fisheku luftarak, specialistët për Hetimin e Krimeve të Komisariatit të Policisë Sarandë, në bashkëpunim me Prokurorinë e rrethit, bënë të mundur zbardhjen dhe dokumentimin e ngjarjes, për të cilën u vunë në pranga shtetasit:
-H. M., 33 vjeç, banues në fshatin Stjar, Delvinë, për veprën penale “Mbajtja pa leje dhe prodhimi i armëve, armëve shpërthyese dhe i municionit”; -M. M., 63 vjeç dhe L. R., 51 vjeç, të dy banues në fshatin Stjar, Delvinë, për veprat penale “Veprime që pengojnë zbulimin e së vërtetës” dhe “Kallëzimi i rremë”.
Nga provat e siguruara dyshohet se më datë 20.09.2023, shtetasi H. M. është vetëplagosur aksidentalisht, gjatë kohës që punonte në tokën e tij, me një armë zjarri të cilën e posedonte pa leje. Gjithashtu, dyshohet se shtetasit M. M. dhe L. R. kanë fshehur armën e zjarrit, si dhe se kanë bërë kallëzime të rreme, me qëllim pengimin e zbulimit të së vërtetës së kësaj ngjarjeje. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme./Zëri.ai
