
TIRANË - Pasi në Turqi u arrestua 43-vjeçari Dritan Rexhepi, Interpol Tirana dhe institucionet e drejtësisë në vendin tonë kanë nisur procedurat për ekstradimin e tij në Shqipëri. Ekstradimi drejt Shqipërisë i 'mbretit të arratisjeve' mund të jetë shumë i vështirë, pasi Rexhepi kërkohet nga së paku 3 shtete, Shqipëria, Italia dhe Ekuadori.
Dritan Rexhepi arriti që të kapej pas bashkëpunimit të mes agjencive ligjzbatuese të disa vendeve partnere dhe Shqipërisë. Ai konsiderohet si koka e e kartelit të drogës dhe u arrestua me një pasaportë kolumbiane me emrin Benjamin Omar Perez Garcia.
Njoftimi i policisë:
Ky shtetas ishte shpallur në kërkim ndërkombëtar nga Interpol Tirana, më datë 26.03.2006, pasi Gjykata e Shkallës së Parë për Krimet e Rënda, Tiranë, me vendimin e datës 06.06.2013, e ka dënuar me 25 vjet burgim, për veprën penale “Vrasja me paramendim”, kryer në bashkëpunim, “Plagosja e rëndë me dashje”, kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”.
– Gjykata e Shkallës së Parë Fier, me vendimin e datës 26.11.2015, e ka dënuar me 4 vjet burgim, për veprat penale “Falsifikimi i letërnjoftimeve, i pasaportave ose vizave”, në rrethana rënduese dhe “Falsifikimi i vulave i stampave ose formularëve”, në rrethana rënduese.
– Gjykata e Shkallës së Parë Tiranë, me vendimin e datës 31.01.2020, i ka caktuar masën e sigurisë “Arrest në burg”, për veprat penale “Rrëmbimi ose mbajtja peng e personit” dhe “Trafikimi i narkotikëve”.
Gjithashtu, Rexhepi është shpallur në kërkim ndërkombëtar nga Interpol Roma, Itali, më datë 29.09.2011, pasi Gjykata e Apelit Firence, Itali, me vendimin e datës 15.04.2010, e ka dënuar me 16 vjet e 5 muaj burgim (pjesa e mbetur e dënimit 13 vjet, 8 muaj e 6 ditë burgim), për veprën penale “Grup kriminal me qëllim trafikimin e narkotikëve”, parashikuar nga Kodi Penal i Italisë./Zëri.ai/