DURRËS-Qeveria shqiptare pritet që të hapë shumë shpejt tenderin 390 milionë euro për ndërtimin e portit të ri tregtar në Durrës. Autoriteti Portual ka shpallur në regjistrin e parashikimeve të Agjencisë së Prokurimeve procedurën, përfshirë detajet financiare të kontratës miliardere. Sipas një dokumenti tësiguruar nga Kapitali.al, fondi limit i tenderit është përcaktuar 39.3 miliardë lekë pa tvsh ose rreth 393 milionë euro me kursin aktual. Autoriteti Portual do të këshillohët në procedurën e tenderimit të portit nga kompania hollandeze Royal Haskoning.
Pak ditë më parë, APD nënshkroi një kontratë me negocim të drejtëpërdrejtë në vlerën 12 milionë euro me kompaninë holandeze për konsulencë dhe mbikqyrje në ndërtimin e portit të ri.
“Me propozimin e ministrit të Infrastrukturës dhe Energjisë, Këshilli i Ministrave vendosi të autorizojë Autoritetit Portual Durrës për të negociuar drejtpërdrejt dhe për të lidhur marrëveshje konsulence me subjektin ndërkombëtar “Royal Haskoning DHV”, brenda fushës së kompetencës së saj, një fushë me interes strategjik për proceset e konkurrimit, kontraktimit, ndërtimit dhe mbikëqyrjes së portit të ri të integruar të Durrësit në Porto Romano,” thuhet në vendimin e qeverisë.
Kjo është vetëm faza e parë e ndërtimit të portit të ri të mallrave, i cili do të ndërtohet në zonën e Porto Romanos. Qeveria vendosi të ndërtonte një port të ri tregtar, pai portin ekzistues të Durrësit e çmontoi për t’ia dhënë tokën kompanisë arabe Eagle Hills për ndërtimin e portit të jahteve dhe kullave rezidenciale.
Ky veprim është cilësuar nga opozita si një nga aferat më të mëdha korruptive në historinë e Shqipërisë, përmes të cilës qeveria i fali 86 hektarë tokë një kompanie private dhe nga ana tjetër detyron qytetarët shqiptarë të paguajnë qindra milionë euro për të ndërtuar portin e ri, pas shkatërrimit të portit ekzistues në Durrës. Sipas regjistrit të parashikimeve, tenderi për ndërtimin e portit të ri do të hapet në dhjetor të këtij viti.
Vlera e investimit për ndërtimin e Portit tregtar në Porto Romano arrin në mbi 422 milionë euro. Ndërkohë kostoja totale e këtij projekti shkon në 43 miliardë lekë. Porti i ri tregtar pritet të përpunojë rreth 2 milionë kontenierë në vit, ndërsa do të presë rreth 1 milionë pasagjerë./ZËRI
