MIRDITË- Banorët e zonës së Kaçinarit kanë protestuar sot për shkak të degradimit të rrugës Rrëshen- Bukmirë. Ata protestuan para bashkisë së Mirditës, ku kërkuan ndërhyrje të shpejtë për rikonstruktimin e rrugës, pasi u rrezikohet jeta. Si pasojë e erozionit, rruga ka pësuar shembje të shumta. Banorët kërkojnë që prokuroria të nis hetimet, pasi pretendojnë se janë kryer shkelje gjatë vitit 2018, kur u ndërtua rruga.
"Rruga është shembur dhe ne rrezikojmë jetën! Kur dalim në punë nuk dimë a kthehemi gjallë. Policia duhet të vije t'i vendose shiritin. Ajo rruge eshte skene krimi. prokuroria te hetoje ish-kryebashkiakun që e mori ne dorezim kete rrugë në 2018", thanë ata.
Kryetari i Bashkisë Mirditë Albert Mëlyshi tha se njësia vendore e ka të pamundur te ndërhyje me buxhetin e saj, por do të kryhen disa ndërhyrje të vogla. Rruga rurale Rrëshen-Bukmirë me gjatësi 16 km u ndërtua në vitin 2018 nga kompania që shfrytëzon HECI-in në këtë zonë. Por, investimi në këtë rrugë është dëmtuar brenda një kohë të shkurtër, duke prekur qindra banorë të kësaj zone./ZËRI
