ROMË- Trupi i Ilaria Sulës u gjet sot në një valixhe hedhur në një humnerë. 22-vjeçarja ishte zhdukur prej 25 marsit. Për vrasjen e saj, u arrestua ish-i dashuri i saj filipinez, Mark Samson, 23 vjeç. Samsoni pranoi krimin dhe tha se e vrau atë pasi nuk pranonte dot ndarjen.
“Më vjen keq për çfarë bëra”, është shprehur ai para hetuesve. I riu ka pranuar krimin dhe ka treguar se ku ndodhet trupi i saj. Por, ndërkohë po vlerësohet edhe qëndrimi i prindërve të tij. Si të afërm të autorit të krimit të rëndë, ata nuk mund të akuzohen për “bashkëpunim në krim”, por nëse shfaqet një pistë e re, si përfshirja e tyre në fshehjen e trupit, pozita e tyre do të përkeqësohet. Kjo pasi, në momentin e krimit ata ndodheshin në shtëpi.
Në orët në vijim ata do të merren në pyetje nga hetuesit, të cilët janë në pritje të rezultateve të autopsisë (e cila do të kryhet të enjten) për të zbardhur rrethanat e vdekjes së 22-vjeçares. Tashmë në trupin e të rese janë gjetur disa plagë me thikë, njëra prej të cilave në qafë./ZËRI
