TIRANË- Qytetarët kanë vijuar edhe këtë të hënë protestën e tyre në kryeqytet, duke shënuar ditën e 72-të të tubimit të përditshëm. Protestuesit u mbledhën fillimisht në sheshin "Skëndërbej", ku më pas nisën marshimin e tyre në drejtim të Kryeministrisë.
Me pankarta dhe thirrje të ndyshme, u shoqërua marshimi i ditës së sotme drejt Kryeministrisë, ku ju bashkuan edhe qytetarë të tjerë të cilët janë me një qëllim të përbashkët.
Edhe ditën e sotem përpara godinës së Kryeministrisë priten të mbahen fjalime nga qytetarë të ndryshëm.
Kërkesat që kanë parashtruar qytetarët:
1. Dorëheqjen e panegociueshme të kryeministrit dhe të qeverisë.
2. Krijimin e një qeverie teknike tranzitore, jopartiake dhe me mandat 12-mujor.
3. Ndryshime kushtetuese, ku të gjithë shtetasit shqiptarë të jenë të barabartë para ligjit, si dhe miratimin e tyre me referendum popullor, duke përfshirë ndër të tjera: ndryshimin e Kodit Zgjedhor, ndryshimin e ligjit për financimin e partive politike dhe organizatave të ndryshme, kufizimin e ushtrimit të detyrës së kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.
4. Paralelisht kërkohet anulimi i ndryshimeve të bëra në ligjin për zonat e mbrojtura, anulimin e ndryshimeve të bëra në ligjin për trashëgiminë kulturore, shfuqizimin e Paketës së Maleve, si dhe shfuqizimin e statusit dhe të kuadrit ligjor për investimet strategjike.
5. Kërkohet një kontratë të re sociale mes qytetarëve dhe shtetit, e cila do të përpilohet pas konsultimit me intelektualë, ekspertë teknikë dhe qytetarë apartiakë, të propozuar nga sheshi i protestës./ZËRI
